Krismas hmang ṭha Liverpool

December 22 khan Liverpool chuan 2-0 in Wolves an hneh a, he inkhelah hian Mohamed Salah leh Virgil van Dijk te chuan goal khat ve ve an khung bawk a, hetihlai hian an elpui ber Manchester City chuan 2-3 in Crystal Palace an ngam lo thung. 

Liverpool chet fuh laia City an chetsual avangin Reds-in Premier League table-ah point liin hma an hruai fal a, mahse Merseyside club ṭantute tana thu hriat nuam lo tak turin 'history' phawrh chhuah a ni.

Tun hnai Premier League season sawm liam taah khan season riatah chuan Krismas laia hmahruaitu club an champion zel a, season hniha champion lo hi Liverpool an ni - 2008-09 leh 2013-14 season khan Krismas laia hmahruaitu nichungin an champion zui lo. 

Mahse, Liverpool-in 'boxing day' tia hriat lar, Mizote tana 'Ruaiṭheh Ni' December 26-ah khan an mikhual Arsenal chu 5-1 ngawtin an sawp zui a, an elpui ber Manchester City chu Leicester City lakah 1-2 a an lo tlawm bawk si avangin hma an hruai chhunzawm chiang hle. 

Arsenal lakah hian Roberto Firmino chuan goal thum khungin hattrick a siam a, Mohamed Salah leh Sadio Mane ten goal khat ve ve an khung bawk - Gunners tana Ainsley Maitland-Niles-a'n minute 11-na leka goal hmahruai a khung chu Reds chhaih kawlhna goal a ni. 

History keu leta Liverpool sawi ṭhaihtu te an ngawi rih a, Liverpool fans an hawi sang hle thung - Nizan khan Manchester City nen an inkhel a, he thu buatsaih a nih lai hian result kan hre hman lo. Pep Guardiola enkawl City hian hnehna chang pawh ni se Liverpool aiin point liin an la hniam tho ang.