Nadal malpui a hliam

Tennis season an ṭan chauh a, world number 2 Rafael Nadal chu malpui vei lam hliam vangin a inkhel thei rih lo. Nadal hi Brisbane International aṭangin a inhnukdawk a, January 14 aṭanga khelh tur Australian Open-ah erawh a inlan theih beisei a ni.

Kum 32 mi Nadal hian Australian Open inbuatsaih nan Brisbane International khelh ngei a duh a, mahse MRI scan neih a nih hnuah doctor ten inkhel rih lo turin an ti ta zawk.

Spanish tlangval Nadal chuan, "Ka inkhel lui a nih chuan hliam na zawk tawrh theih a nih thu min hrilh, chumi bakah Melbourne ka pan theih loh phah hial thei. Ngun taka ka ngaihtuah hnuah ka inkhel lui ta lo a ni," tiin a sawi.

Grand Slam vawi 17 champion tawh Nadal hian season hmasa tawp lam khan hliam vangin a khel lo a, a thiam pariat inelna ATP Tour Finals-ah pawh a inlan lo hial. Kar hmasa khan Abu Dhabi-ah exhibition match chu a khel thei tawh a ni.

Brisbane International-ah hian Nadal inlan thei lo mah se Andy Murray erawh hun rei tak hnuah a inkhel thei ve leh tawh thung. Britain tlangval hian harsa lutuk loin match hmasa berah hnehna a chang a, second round-ah erawh Russian tlangval Daniil Medvedev lakah darkar khat leh minute 21 chhungin 7-5, 6-2 in a chak lo thung.