Chelsea player thar Christian Pulisic

Chelsea chuan Borussia Dortmund attacking midfielder Christian Pulisic chu pound maktaduai 58 in an lei a, mahse tun season tawp thleng chu Bundesliga hmahruaitu tan hian loan hmangin a khel chhunzawm rih ang.

Kum 20 mi Pulisic hian 2015 khan rawlthar beiseiawm tak ni chungin Dortmund hi a zawm, Premier League club Liverpool leh Arsenal te nen pawh sawi zawm a lo ni tawh ṭhin. Nikum November thla khan English club lian tan eng tik niah emaw chuan khelh a la beisei thu a sawi tawh a, hei vang hian contract pawtsei tura an tihna pawh a hnawl.

United States tan match 23 khel tawh Pulisic chuan, "Club hlun leh ropui tan ka khel thei tur hi ka lawm takzet," a ti. American player zingah Pulisic hi manto ber a ni, 2017-a Wolfsburg-in John Brooks man atana euro maktaduai 20 an pek chu a rawn khum chiang hle a ni.

Dortmund director Michael Zorc chuan, "Christian hian Premier League khelh hi a duhthusam a ni reng ṭhin a, kan hnena cham zui turin duh mah ila player berin a duhthlanna chu kan zah sak a, Chelsea lamin sum tam tham taka an sawmna hi kan hnawl ta lo," tiin a sawi. Pulisic hian June 2020 thleng daih contract a neih chu a pawt sei lo.

Pulisic hian kum 17 mi chauh ni chungin January 2016 khan Bundesliga match hmasa ber a khel a, thla hnih hnu lekah ram tan a inlan ṭan nghal bawk. German football inelna sang berah hian match 81 khelin, Champions League match 20 a khel hman bawk.

Season kal laiah Dortmund tan hian inelna hrang hrangah match 18 khelin goal thum a khung a, England international Jadon Sancho a awm tak avangin Pulisic hian season hmasa angin khelmual chhungah hmun a chang tam tawk lo - Blues lamin an player duh an lakluh theihna kawng a inhawn zau phah ta sawt.

Chelsea director Marina Granovskaia chuan an player thar hi European football khel lai rawlthar zinga beiseiawm ber pawl ni hialin a sawi a, "Kum 20 chauh a la ni a, hun rei tak chhung chu Chelsea player pawimawh tak a ni chhunzawm thei ang," a ti.

Bundesliga player zingah Pulisic hi manto pathumna a ni, Dortmund player hlui tho Ousmane Dembele chuan pound maktaduai 135 zetin Barcelona a zawm tawh a, Manchester City chuan Kevin de Bruyne lakluh nan 2015 khan Wolfsburg lakah pound makatduai 55 an lo pe tawh bawk.

Maurizio Sarri enkawlna hnuaiah Chelsea hian Premier League season bul an ṭan fuh hle a, mahse tun hnaiah an chesual zauh zauh. Nilaini zan khan an mikhual Southampton nen goal khung loin an inhnehtawk a, match 21 khelhah point 44 hmuin palina an ni mek.

Italian manager Sarri hian nikum nipui bazar lai khan Napoli aṭangin Jorginho a lalut tawh a, keeper manto Kepa Arrizabalaga a nei tawh bawk. January bazar inhawn rualin Pulisic a lalut leh ta bawk - a duh anga khel thei tur chi chu muangchangin a lalut zel dawn niin a lang.

Hetihlai hian midfielder Cesc Fabregas erawh a chhuak ngei dawn niin a lang; Spanish midfielder hi kum 31 mi a ni tawh a, player ṭha tak la ni mah se Sarri hnuaiah hmun a chang tam tawk lo - French Ligue 1 club talbuai mek AS Monaco nen sawi zawm a ni.

Chelsea hian tlarhma lama chhawr chi player pathum Olivier Giroud, Pedro leh Callum Hudson-Odoi te hliam vangin an chhawr thei lo mek a, Saints lakah Willian-a'n hliam a tawrh leh tak avangin tun thla chhunga match riat khelh tur nei Blues tan Fabregas chhuahtir ngawt hi a fuh kher lo mai thei.