Kan ṭhatna turin ka ti - Emery

Arsenal manager Unai Emery chuan Fulham laka goal khungtu Alexandre Lacazette a thlak chungchang a sawifiah a, team tana ṭha tura a ngaih angin thutlukna a siam mai ṭhin tih a sawi.

January 1 zan khan Arsenal hian Emirates Stadium-ah an mikhual Fulham 4-1 in an hneh, he inkhelah hian France international striker Lacazette-a'n goal khungin khel ṭha viau mah se minute 75-naah thlak a ni. Fans lamin amah an thlawp zia leh thlak lo tura an duh thu an lantir hial!

Spanish manager Emery chuan, "Fans lam chet dan kha ka hrethiam, inkhel kha ngun taka kan thlir chuan balance taka kan kal theih nan inthlak kha kan ngai a ni. Fulham midfielder Jean Michael Seri a rawn lut a, ani khan a duh tawka ball a khawih theih loh nan amah hnaih tur kan dahluh a ngai," tiin Aaron Ramsey a dah luh chhan nen a sawifiah.

Krismas vuakvetah Arsenal hi an elpui Liverpool lakah 5-1 ngawtin an tlawm a, hei vang hian Gunners hian match khata khel hnem zawk chungin hmahruaitu Reds hi point 13 ngawtin an phak lo - Emery naute tan season thara Chanpions League khel phak pawh thil awlsam a ni dawn lo.