India hmaah fiahna hautak UAE

Asian Cup-a an match hmasa berah 4-1 ngawta Thailand an sawp hnuin India-in fiahna hautak an hmachhawn leh nghal dawn a, zanin dar 9:30-ah inelna thlengtu United Arab Emirates nen an inkhel ang. 

India-in result duhawm tak nei mah se an hmaa ding tur hi inelna thlengtu leh team ṭha zawka ngaih UAE an nih avangin a awlsam dawn lo tih a chiang a, Blue Tigers tan he team hi ngaihthah an thiang lo. 

Blue Tigers captain Sunil Chhetri chuan, "Kan group awmnaah chuan Thailand hi a awlsam ber tura kan ngaih sa a ni a, UAE hi a harsa ber dawn a ni," tiin zanin an inkhel tur a thlir lawk. 

Match hmasa berah rin loh takin Jeje Lalpekhlua chu bench lamah dah a ni a, Hnahthial tlangval aiah hian winger Ashique Kuruniyan luhtir niin a khelh ngai lohna hmun striker-ah khelhtir a ni a, Sunil Chhetri nen an inkawp.

Chhetri chuan, "Jeje hi kan player ṭangkai a ni a, Asian Cup kan khelh theih chhan lian tak pawh a ni a, Ashique tan chuan a hmun ruak hnawhkhah a harsa a ni," tiin a sawi a, Jeje nena khelh dun nuam a ti zawk niin a lang. 

Hnahthial tlangval hian Thailand lakah khelmualah minute 12 chauh hun a hmang chungin goal 'class' a khung a; club tan season hmang ṭha lo mah se  zaninah UAE lakah inkhel bul a ṭan a nih pawhin a mak lo ang. 

India coach Stephen Constan-tine-a'n league-a khel ṭha player aiin a player hriatchian sa koh a thlang zawk ṭhin a, hei vang tak hian sawisel pawh a tawk nasa hle - mahse a tumah a chiang. 

Asian Cup-a feh chhuak player 23 zingah Sunil Chhetri, Jeje leh Balwant Singh-te chiah hi Constantine hnuaia ram tana an match hmasa ber khel lo an ni - English coach hian a player  hriat chian leh a duhdana khel thei a duh ber. 

Jeje chuan, "National team ni mah se player kan inthlak reng loh avangin kan inhrec hiang a, kan in man bik a, khelh ho a nawm phah a ni," tiin Vanglaini hnenah India coach a thlawp thu a lo sawi tawh. 

UAE an ṭha?

Group A-ah chuan UAE hi last 16 lut tura rin sa an ni. Team ṭha tak an nih piahlamah a thlengtu an ni - Asian Cup-a an sulhnu pawh a chhe hran lo.

Kum 1996 khan final an lut a, Saudi Arabia chu penalty-ah an ngam lo - hemi ṭum pawh hian Asian Cup thlengtu tho an ni a, Asian Cup hnuhnung ber 2015-ah khan pathumna an ni bawk. 

Mahse, UAE hian an match hmasa berah Bahrain chu goal khat ve ve khungin an inhnehtawkpui hram a, India-in Thailand an sawp bawk avangin Blue Tigers hi an phur hle ang. 

Kum 28 mi Ali Mabkhout hi Asian Cup hnuhnung bera top scorer leh team of the tournament-a tel thei kha a nih avangin ven bik a finthlakin a rinawm. 

Asian Footballer of the Year (2015) ni thei Ahmed Khalil hi ram tan match 100 khelha goal 50 khung tawh a ni a, goalkeeper Khalid Eisa hi Al Ain tana khel niin Bahrain lakah a che ṭha hle. 

Kum 2011 Asian Cup-a Japan champion puitu coach Alberto Zaccheroni chu UAE beiseina kengtu a ni a, Italian coach hi Milan, Inter Milan, Lazio leh Juventus pawh lo enkawl tawh a ni. 

Team pahnih hi vawi 11 an lo intawng tawh a, India-in vawi hnih chiah hnehna la chang vein vawi khat an inhnehtawk a, vawi riat an tlawm. 

India leh UAE intawn hnuhnung vawi ngaah India-in goal hnih chiah an khung ve a, goal khat hi Jeje-a khung a ni. 

July 2011 khan Delhi khawpuia ruahsur hnuaiah India-in World Cup qualifier-ah UAE an mikhual a, 2-2 in an inhnehtawk - Jeje goal khung hi Lalrindika Ralte siamsak a ni a, goal dang hi Gouramangi Singh khung a ni thung - hei hi an intawn hnuhnung ber a ni.

UAE hi an ṭang hle mai a, an rama Indian ṭhahnem tak awmte'n India an ṭan dawn tih an hriat avangin UAE fans ko khawm turin ticket 5,000 leiin a thlawnin an sem!