Aizawl FC coach thar Standly

I League club Aizawl FC chuan head coach Gift Raikhan thlak nan Standly Rozario Henry an lakluh thu nimin khan an puang. 

Aizawl FC hian Inrinni khan Indian Arrows chu an mual RG Stadium, Mualpuiah 0-1 in an hneh lo a, hei vang hian table-ah 10-naah awmin an hnuaia awm chu foreigner tel loa khel Shillong Lajong chiah a ni. 

Mizo club hian match kua khelh tur an la nei a, an chunga awm Arrows leh Gokulam an phak lohna hi point khat chauh a ni a, paruknaa awm Mohun Bagan nen an inkarah point ruk chauh a awm bawk avangin insiamṭhat nan hun a la awm. 

Aizawl FC coach thar Standly Rozario hi AFC Pro license nei a ni a, Indian football-ah tawnhriat ṭha tak neiin East Bengal, Mohun Bagan, Salgaocar SC leh Shillong Lajong te a enkawl tawha. Nikum khan Bengaluru club Ozone FC a kaihruai a, Mizo club hian a awl lai an chang fuh. 

Standly hian vawiinah Aizawl a thleng ang a, Zirtawpni tlai dar 2:00-a Real Kashmir an mikhual hunah team a enkawl nghal ang.

Kum 58 mi Standly hian India National team-ah pawh assistant coach hna a chelh tawh a; Blue Tigers-in World Cup Qualifying, Olympic Qualifying, Asian Games, AFC Asian Cup, AFC Challenge Cup, SAFF Cup leh Nehru Cup te an hmachhawn ṭumin coaching staff-a a tel avangin Indian player a hre chiang viau tura ngaih a ni.