Mizoram-in NE Zone Santosh Trophy thleng dawn

Mizoram Football Asso-ciation chuan National Football Championship for Santosh Trophy North East Zone Qualifying Round chu February 11-16, 2019 chhungin Aizawlah a thleng dawn.

India rama state leh state football inelna sang berah hian India hmarchhaka state pasarihte an inel dawn a, group hnihah ṭhen an niin group-a a sang ber ve vein final round an lut ang. 

Mizoram hi Group A-ah Meghalaya leh Tripura nen an awm a; Group B-ah Manipur, Assam, Arunachal Pradesh leh Nagaland-te an awm thung.

MFA chuan Mizoram Santosh Trophy team enkawltu turin Chhinga Veng coach Lalsangzuala Hmar leh a thawhpuite a thlang a, anni hian team an thlangfel tawh.

Santosh Trophy-ah I League player thlan theih a ni lo a, Mizoram Police FC-te All India Police Meet-a inkhela an zin chhuah dawn avangin an player koh tel an ni lo.

Santosh Trophy danah hian player 20 thlan chhuah tur a ni a, chung zinga panga chu kum 21 hnuai lam an ni tur a ni.