Khelo India an ṭan ta
Khelo India Youth Games chu nimin aṭang khan Pune, Maharahstra-ah a hawnna neih a ni a, vawiin hian inelna tam zawk ṭan a ni ang. Mizoram aṭang pawhin infiammi 118 zet an kal a, team official nena kal zat chu 146 an ni.
India ramin infiamnaa hma a sawn theih nan Khelo India hi siam len a ni a, nikum khan hlawhtling takin Delhi-ah neih a ni tawh. Kuminaah hian infiamna huang zauhin discipline 18-ah inelna hi neih a ni dawn a, age group pawh tih tam a ni bawk.
Inelna hi tun ṭumah hian school leh college zirlai tan pawh remchang siam sak an ni a, kum 10-21 inkar a nih tawh avangin tun ṭumah hian mi 6,000 zet tel tura beisei a ni. Inelna hi Pune's Balewadi Sports Complex, Army Sports Institute (archery), Mamurdi and Police Ground Shivaji Nagar (football); NDA Hockey Ground (girls hockey) leh Mumbai-a MHA Mahindra Hockey (boys hockey) ah neih a ni dawn.
Mizo vanduai
Nimin khan weightlifting-ah Vanlalruata a inlan a, palina niin medal a lak phak lohna hi kg li chauh a ni.
Ruata hian snatch-ah kg 71 a chawi a, clean and jerk-ah kg 90 a chawi tawh hnua a chance hnuhnung berah medal a dawn ngei tumin kg 95 chawi beiseiin risk a la a, a chawi thei ta lo. Hei vang hian a chawi zat belh khawm hi kg 161 a ni.
Beisei a sang
Weightlifting-ah hian Mizo-ramin Youth Olympics gold medallist Jeremy Lalrinnunga an kawl avangin medal an chawi ngei dawn niin a lang a, Govt Complex rawlthar hi national media pawhin Khelo India vawrh larna atana an hman ber a ni.
Jeremy bakah hian Jacob Vanlaltluanga leh Zakhuma te chu medal dawng tura ngaih an ni bawk a, nikum khan rawlthar lifter beiseiawm pathum hi zirna avangin an training-an hmun Maharashtra tan an inlan.
Football lam hi
Khelo India ṭan kumah Mizoram chu mipa Under 17-ah an champion a, tun ṭumah hian Under 17 leh Under 21 awmin champion beiseiawm zinga mi an ni.
Champion lai Mizoram Under 17 team chu group A-ah Punjab, Uttarakhand leh Karnataka nen an awm ho a, vawiin tlai dar 3:00-ah Karnataka nen an inkhel dawn.
Chanmari FC coach C. Chawngthansanga kaihhruai Mizoram Under 21 team hi Kerala, Chandigarh leh Maharashtra nen group A-ah an awm a, vawiin tlai dar 3:00 hian Maharashtra nen an inhmachhawn ang.