Celtic-in Ivorian striker lalut

Scottish Premiership-a nomawi chawi ngei tum Celtic chuan Ivory Coast striker Vakoun Issouf Bayo chu Slovakian club Dunajska Streda aṭangin kum li chhung atan an lalut a, pound maktaduai hnih vel an insengah ngaih a ni. 

Kum 21 mi forward hian Slovakian Super Liga lamah a hming a chher viau a, tun season-ah match 23 khelin goal 18 a khung tling der tawh a, kum 2017-a Slovakia a pan hmain Tunisia lamah a khel ṭhin.

Celtic hian West Brom winger Oliver Burke leh Paris Saint-Germain striker Timothy Weah te chu season tawp thleng atan lona-in an hawh tawh bawk. 

Scottish champion Celtic hian nipui transfer lai khan French striker Moussa Dembele chu Lyon lamah pound maktaduai 19 bawr velin an lo hralh tawh a, mimal thil avanga Leigh Griffiths a chawlh mek bawk avangin striker hi an mamawh hle a ni.