Halep a chak lo nghal

Tennis hmeichhe world number 1 Simona Halep chuan nimin khan tun season chhunga a match hmasa ber a khel a, Romanain nula hi Ashleigh Barty hneh loin Sydney International second round aṭangin a tla nghal.

Season hmasa tawp lamah khan Halep hi a hnungzâng na vangin a chawl hma a, WTA Tour Finals pawh a khel thei lo. A hliam a dan hnuah beiseina sang tak nen rawn kir mah se world number 15 lakah hian 6-4, 6-4 in a chak lo zawkah a ṭang.

Kum 27 mi Halep hi season hmasa khan Austra-lian Open-ah pahnihna a ni a, kuminah pawh champion tura rinkai a ni. Mahse, duhthusama ṭhain inbuatsaihna a neih tak loh avangin a kawng a awlsam lo mai thei.

January thla tir khan Halep leh a coach Darren Cahill te an inṭhen a, hard court season an hman tirh lampangah chuan coach nei loin Halep hian hun a hmang rih dawn a ni.

French Open champion Halep chuan, "Hun rei lote chhungin thutlukna siam mai a harsa, pressure ka nei hran lo a, engtiang taka ṭha nge ka nih fiahna hun a ni ang. Chutih rualin coach tel loa season bul ṭan chu a awlsam dawn lo hle," tiin a sawi.

Tennis season khat chhunga Grand Slam tournament hmasa ber Australian Open hi January 14 aṭangin Mel-bourne-ah khelh a ni dawn a, vawiin hian draw neih a ni ang.