Egypt-ah Africa Cup of Nations

Confederation of African Football (CAF) chuan Thawhlehni khan 2019 Africa Cup of Nations thleng tur a ti chiang a, ram pahnih buk an nih hnuah Egypt chu thleng tura thlan an ni.

Egypt leh South Africa ten inelna thlen an dil a, CAF executive committee ten vote thlakin Egypt hian vote 16 in an hmu hnem zawk. A tira inelna thleng tura an ruat Cameroon chu inbuatsaihna an neih ṭhat loh avangin November thla khan sutkir sak an ni a, chawpchilh takin ram dangah nghah a ngaih phah.

Africa Cup of Nations-ah hian ram 24 an inel dawn a, June thlaa khelh tur a nih tawh dawn avangin Egypt hian inbuatsaih nan thla ruk bak hun an nei dawn lo. Chutih rualin Egypt hian 2006 khan inelna hi an thleng tawh a, tun ṭum hi vawi nga an thlenna tur a nih avangin ruahmanna an siamfel thei tura ngaih a ni.

Egypt FA (EFA) president Hany Abu Rida chuan, "Kan chunga rinna nghat ngamtu CAF Executive Committee chungah kan lawm a, chu bakah kawng engkima min thlawp tlattu sorkar chungah kan lawm bawk. 2006 khan inelna hi kan thlang a, khami aia ṭha leh changtlung zawkin kan tih theih ngei ka beisei," tiin a sawi.

Egypt hian inelna hi stadium pariatah a thleng kual dawn a, khawpui lian panga - Alexandria, Ismailia, Port Said, Suez leh an khawpui ber Cairo te chu a thlenna hmun tur an ni ang.