Bengaluru-in Mumbai an sawp

Premier Badminton League khelh laiah Thawhlehni zan khan Bengaluru Raptors chuan an chunga awm Mumbai Rockets 5-0 in an sawp a, semifinal khel phak chin chiah palina dinhmun an luah zui nghal bawk.

Sree Kanteerava Stadium-a inkhelah Bengaluru lamin an trump match-ah Thi Vu Thrang hmangin Shriyanshi Pardeshi chu 2-1 in an hneh a, Mumbai lam erawh an trump match atana an thlanah Sameer Verma chu Sai Praneeth lakah 2-1 thoin a chak lo thung.

Bengaluru lamin an player manto ber tura an lakluh Kidambi Srikanth pawhin rintlak a nih zia lantir nan, mipa singles match pawimawh takah Anders Antonsen hneh bawkin duhthusama ṭhain an khel chhuak vek.

Nizan khan league match pahnih khelh leh a ni a, zanin hian league round bik kharna neih tur a ni ang. Bengaluru Raptors leh beisei la nei Chennai Smashers te an intawng dawn a, a chak zawk tan a thiam pali zinga tel theihna kawng a la awm.