Penalty-in Chelsea chungah Spurs hlangkai

Striker Harry Kane-a penalty chhuih luh hmangin Tottenham Hotspur chuan an mikhual Chelsea 1-0 in an hneh a, League Cup semifinal second leg hi January 24 zan hian Stamford Bridge-ah khelh a ni leh ang a, final lut tur zawk a chiang tawh ang.

Wembley Stadium-ah referee Michael Oliver chuan minute 26-naah penalty spot a kawk. Chelsea keeper Kepa Arrizabalaga chu Kane a tih tluk vangin yellow card pek a ni a, England captain hian chakna goal awmchhun khung nan a hmang thung a ni.

Tottenham lamin keeper Hugo Lloris aiah Paulo Gazzaniga an hmang a, a bak chu team pahnihin an player neih ṭhat ang an thawhchhuah pui. South Korea FA leh Spurs lam inremna vangin Son Heung-Min chu Asian Cup group match hmasa pahnih khel lo tura tih a ni a, hei vang hian Blues a hmachhawn theih phah.

Spurs striker Kane chuan Kieran Trippier-a cross chu hnai tak aṭangin mawi zetin bin mah se keeper manto Kepa-a'n a dan sak. Kane hian a hun ṭha neih vawi hnihna erawh a hlah nawn lo, a penalty hlawhchhuah khung turin harsatna a nei lo.

Penalty an chawi danah erawh Chelsea lam an lawm lo, assistant referee-in offside nia ngaia a phar zuk avangin Blues player ṭhenkhat an inthlahdul hman. Mahse, second 93 hnuah referee Michael Oliver-a'n video assistant referee (VAR) thutlukna la zawkin penalty a pe tlang.

An intawn hnuhnungah Chelsea 3-1 in an chak lo a, Maurizio Sarri nau ten tlawm nawn an tum lo. Midfielder N'Golo Kante-a'n hnai tak aṭangin goal ban a tih per a, tun hnaia Bayern Munich nena sawi zawm Callum Hudson-Odoi-a'n inkhel bul ṭanin, a ball pet ṭha tak chu Spurs keeper Paulo Gazzaniga-a'n lo nam hman mah se goal ban a per bawk.

Italian manager Sarri-a FA Cup lama goal hnih khungtu Alvaro Morata chu squad-ah a telh lo a, Olivier Giroud pawh bench-ah dah a ni. France interantional hi hun tawp dawnah luhtir ni mah se danglamna a siam phak lo.

Striker pahnih laka rinna nghat zo lo Sarri-a'n Eden Hazard chu tlarhma laiah a dah leh a, Belgium international hian box chhungah mawi taka ball lalutin Spurs defender Toby Alderweireld banah pet per mah se penalty pek an ni lo - fedender Andreas Christensen chuan hnai zet aṭangin a khung ṭhelh bawk.

European League lian - Spanish La Liga, Bundesliga, Serie A leh Ligue 1-ah te VAR hman a ni tawh a, ruahman dan chuan season thar aṭang chuan Premier League-ah pawh hman a ni dawn, tun thleng chuan a duh leh duh lotu lam inhnialna a la tam hle.

VAR vangin Tottenhma lamin hnehna an changah a ngaih theih a, mahse manager Mauricio Pochettino chuan VAR a duh loh thu a sawi! Poch chuan, "VAR hi ka duh lo, tun ṭumah chuan a hlawkna kan tel ngei mai. Mahse, World Cup leh league danga an hmanna kan en hian, hman ṭan a nih aṭangin midang pawhin an ngaina lo niin ka hria.

"Hlawkna hmuh phahtu nih chu a lawmawm, mahse hetiang inkhel bikah phei chuan a ṭha lo. Kar tin La Liga ka en a, an duh loh zia ka hmu. EPL-a hman hmain thla ruk hun a la awm a, hmasawnna tur lai a la tam hle," tiin a sawi.

Chelsea manager Sarri-a'n hnehna chang zawk tura an inngaih thu sawiin, "Tottenham box chhungah vawi 70 vel ball kan khawih a, anni lam khan vawi 11 vel chauh an khawih thung. Inkhel pumpui kha kan thlir a nih chuan chak kan phu zawk a ni. Hun tawp lam minute 25 chhung vel khan kan tlarhnung a nghing deuh tih mai loh chu kan khel chhe lo, result erawh a lawmawm loh," a ti.

VAR chungchang sawi zuiin Sarri chuan, "Italy-ah an hman ṭan kum khan season chanve chhung kha chu buaina thlentu a ni, referee tan khawl nena hnathawh dik nghal vek chu a harsa a nih hmel, England-ah pawh referee an la inpeih tawk lo tih a lang.

"Chelsea lam camera aṭang chuan Kane kha chiang takin a offside ngei mai, mahse a pawimawh zawk chu linesman thutlukna a tlang lo khan kan player chungah nghawng lian tak a nei niin a hriat. League-ah hman a ni lo chung hian Carabao Cup-a hman a ni thung si hian player leh referee tan thil a ti khirh deuh niin a ngaih theih," tiin a sawi.