Bayern-ah Pavard kal dawn

Bayern Munich chuan Benjamin Pavard an lalut dawn, France international defender hi VfB Stuttgart tana khel lai ni mah se season tawpah German champion hi a zawm dawn tih a chiang tawh a, Allianz Arena-ah kum nga daih contract a ziak ang.

Kum 22 mi Pavard hi tlarhnungah chuan a chhawr kual theih vek a, mamawh chuan defensive midfield-ah pawh hman theih a ni. 2016 khan Lille aṭangin Stuttgart a zawm a, 2. Bundesliga-ah match 21 khelin a club thar hi a champion pui.

Stuttgart hi Germany football inelna sang ber Bundesliga khel turin an tling a, a club tan player ṭangkai nih chhunzawmin 2017-18 season hian match zawng zawng a khel kim vek; ram tan khelhna hmun chang nghalin France-in World Cup an chawi theih nana player pawimawh a ni phak hial.

France tana match 18 khel tawh Pavard hi tunah chuan chawn tihrawl na vangin a chawl mek a, mahse thlasik chawlh an hman zawh hunah chuan rawn kir nghal mai thei tura ngaih a ni.