Iraq leh Vietnam an hmuhnawm

Thawhlehni zan Asian Cup inkhel hmuhnawmah Iraq chuan 3-2 in Vietnam an hneh hram a, hetihlai hian Saudi Arabia chuan awlsam takin North Korea chu 4-0 in an sawp thung. 

Asian team ṭhangduang Vietnam hi a tir aṭangin an hmuhnawm nghal a, minute 24-na leka Nguyen Quang Hai ball cross chu Iraqi defender ten an chhut sual a, Ali Faez Atiyah  chuan an lamah a ti lut. 

Iraq-in minute 36-naah Mohanad Ali Kadhim hmangin an si phurh sut mah se Nguyen Công Phuong hmangin Vietnjam-in hma an hruai nawn a, team pahnih an inngam hle. 

Hun tawpa vannei zawk erawh Iraq an ni a, minute 90-na chiahah Ali Adnan chuan freekick hmangin mawi zetin chakna goal a khung - Vietnam tan chhanletna hun a awm tawh lo.

Thawhlehni zan Asian Cup inkhel dangah Saudi Arabia chuan goal an sur tir a, 4-0 in North Korea an sawp. Saudi tan Hatan Bahbri, Mohammed Al-Fatil, Salem Al Dawsari leh Fahad Al Muwallad ten goal khat ṭheuh an khung. 

North Korea hian si hnih an phurh laiin Han Kwang-song chu minute 44-naah a yellow card pahnihna a hmuh avangin an chan a, hneh loh sa nen an tan thawh ngaihna a awm tawh lo. 

Zanin Asian Cup-ah Group B aṭangin inkhel pakhat a awm dawn a, Australia hnehtu Jordan chuan zanin dar 7:00-ah Syria an inkhelhpui ang.