Diaz vangin Pep inchhir lo

Manchester City boss Pep Guardiola chuan rawlthar duhawm Brahim Diaz chu Real Madrid hnenah hralh mah se a midfielder a hralh avang hian inchhirna a neih loh thu a sawi. 

Kum 19 mi midfielder hian Santiago Bernabeu-ah kum ruk leh a chanve chhung khel turin contract a ziak a, Real leh City inremna hi pound maktaduai 21 hu vel a ni. 

Pep chuan, "Kan hnena khelh duh loh player kawl reng hi ka duh lo a, kan tum ang min tumpui thei lotu kawl reng chu a fuh lo a ni. Player dangin chhuah duhna thinlung an put loh ka beisei a, kan hnena cham zel duh tan chuan engtiklai pawhin kawng a inhawng reng a ni," a ti. 

Spanish manager chuan, "Diaz ka hralh hi ka inchhir lo a, a hma hun atan erawh duhsakna ka hlan a ni," tiin media zawhna a chhang zui. 

City hian season hmasa khan an rawlthar duhawm Jadon Sancho chu Borussia Dortmund lakah an lo chan tawh bawk a, hetihlai hian kum 18 mi Phil Foden erawhin City-a cham zel a thlang thung. 

Pep chuan, "Brahim, Phil leh Jadon te kan enkawl dan a in ang vek a, player pawimawh tak vek an nih rualin Phil chiahin cham a thlang thung. Player-te hian khelmualah an chance chu an thawkchhuak tur a ni.

"Europe-a club lian ho en ila, first team-a player naupang an neih zat hi en rawh u. Player ṭhenkhatin an dawhtheih em em laiin ṭhenkhat erawhin an thei lo a ni," tiin player naupang zawkte chuan an khelh phak hun an nghah hram hram a ṭul thu a sawi tel.