Porto-ah Pepe a kir

Portugal defender Pepe chu tun hma lama a khelh tawhna FC Porto-ah a kir leh ta. Kum 35 mi defender hian Portuguese club tan hian season hnih leh a chanve daih contract a ziak.

Estadio do Dragao-ah hian tun hmain season thum chhung hun a hmang tawh a, league nomawi vawi hnih a chawi hnuah Real Madrid a pan. Spanish club tan hian La Liga leh Champions League title vawi thum ve ve a lak pui a ni.

Real Madrid aṭang hian Turkish club Besiktas a zawm leh a, December thla khan a contract a hman zawh hnuah free agent niin a duh lam a zawm thei. Porto-ah hian Real tana a khelhpui tawh keeper Iker Casillas nen hun an hmang dun leh ang.

Portugal tana match 103 khel tawh Pepe chuan, "Porto hi ka tan chuan club hlu tak a ni reng a, a nih chhunzawm zel bawk ang," tiin a sawi a, Portugues club pawhin an defender hlui an nei let leh thei chu lawmawm an tih thu an sawi bawk.