Schalke keeper-in Bayern zawm dawn

Bayern Munich chuan Bundesliga club Schalke goalkeeper Alexander Nubel chu nipui transfer-ah an lakluh tur thu an puang a, kum 23 mi goalkeeper hi free transfer-in an lalut dawn a ni. 

Germany Under-21 international hlui hi season ṭan dawn khan Schalke captain atan ruat a ni a, mahse captain armband hren ai chuan Bayern lama hun hman a thlang ta zawk - kum nga chhung atan contract a ziak. June thlaa Schalke-a a contract tawp tawh tur goalkeeper hian December khan contract thar a ziah loh tur thu a club hi a lo hrilh tawh a, Bayern lam a hawi zui a ni. 

Nubel hi December 15 khan Eintracht Frankfurt midfielder Mijat Gacinovic awm bawrah hlauhawm taka a chet avangin match li atan hrem a lo ni tawh a, Bundesliga-ah hian match 35 a khel tawh. Bayern-ah hian Schalke aṭanga kum 2011-a an lakluh Manuel Neuer chu first choice goalkeeper a la ni reng a, German club tan league match 233 khel tawhin Bundesliga-ah vawi sarih a champion pui a, Champions League (2013) nomawi a chawipui tawh bawk.

Mahse, kum 33 mi Germany international hi 2021-ah a contract a tawp tawh dawn a, Nubel hi Neuer hmun ruak luah tura beisei a ni.