Khelo India Football-ah U 21 mipa leh hmeichhia chak

Khelo India Football chu nimin khan khelh ṭan a ni a, Mizoram aiawh kal team pathum zingah Under 21 mipa leh hmeichhe team ten hnehna an chang a. Champion lai Under 17 mipa team erawh Karnataka lakah an tlawm thung.

Mizoram Under 21 mipa team hian match hmasa berah Maharashtra chu 3-0 in an hneh a, coach Chawngthansanga hote tan hian Chawnpui tlangval David Laltlansanga (7'), Republic Veng tlangval Lalruatfela (38') leh Chanmari tlangval Lalnunzama (78') ten goal an khung. 

Group khat aṭangin team pahnih tlang tur a ni a, Mizoram hi Group A-ah awmin Chandigarh (Janaury 12) leh Kerala (January 14) te an hmachhawn leh ang.

Mizoram Under 21 hmeichhe team-in Himachal Pradesh 13-0 in an sawp a, coach Vanlalpeka hote tan Lalnunsiami (Bukpui) leh Lalchhanhimi (Champhai) ten goal li ve ve an khung a, Lalrinmuani(Darlawn) chuan hattrick siamin  Lalnuntluangi'n (Kolasib) goal hnih a khung bawk.

Hmeichhe team hian Odisha (January 12) leh Tamil Nadu (Jan 14) te an la khelhpui dawn a, semifinal kawng a inhawng zau hle.

Mizoram Under 17 mipa erawh an chak lo a, Karnataka lakah goal li chhuahin Lallianmawia chuan goal thum an phur laiin goal khat a chhang let.

 Mizoram U 17 mipa team hian  Uttarakhand (Jan 12 ) leh Punjab (Jan 14) te an la khelhpui dawn a, semifinal lut tur chuan chet sual a thiang tawh lo.