Turkmenistan lakah Japan vannei

Asian Cup nomawi chawi tura beisei zinga mi Japan-in an match hmasa bera hnehna chang turin vanneihna an mamawh tel a, team ṭha lo zawk nia ngaih Turkmenistan chu Nilaini zan khan 3-2 in an hneh hram. 

Turkmenistan tan hian captain Arslanmurat Amanov chuan minute 27-na lekah long range shot hmangin mawi zetin goal hmahruai a khung a, European club ṭha a khel thei player ṭha rual awmna Japan an hawihai. 

Tlarhmaah Werder Bremen forward Yuya Osako a hmuhnawm a, mahse Japan-in an beisei goal an zawng hmu thei lo - Turkmenistan an duai bik lo a, goal hmahruai an khung miau avangin inrintawkna an nei a, chawlhlawk hma hretin Ahmet Atayev chuan an goal hnihna a khung teuh hle. 

Chawlhlawk hman a nih hnuah Japan an insiamṭha ta nge nge a, Osako chuan second half minute 15 chhungin goal hnih a rawn khung a, football khawvela rawlthar ṭhangduang pawla an sawi FC Groningen attacking midfielder Ristu Doan chuan minute 71-naah a khung ve leh bawk. 

Turkmenistan an beidawng lo - Atayev chuan minute 79-naah penalty hmangin goal a khung ve leh a, chhanletna tur dang erawh nei tawh loin Japan lakah 3-2 in an tlawm.

Nilaini zan inkhel dangah Uzbekistan chuan 2-1 in Oman an hneh a, Uzbekistan tana Odil Ahmedov goal hmahruai khung chu Oman tan Muhsen Al Ghassani chuan chhanglet mah se minute 85-naah substitute Eldor Shomurodov chuan khelmualah minute hnih chiah hun a hmang hman tihin Uzbekistan tan a khung ve leh a, 2-1 in an chak. 

Qatar-in Lebanon laka hnehna chang turin harsatna an tawk lo a, second half-a Bassam Al Rawi leh Almoez Ali goal khung hmangin 2-0 in hnehna an chang.