Tata Trusts COE an champion

Mizoram Under 15 League-ah Tata Trusts COE chuan final hmuhnawm takah Aizawl FC 3-1 in an hneh a, kum zawnin an champion.

COE tan hian Vanlalmalsawma, G. Gayara leh Emboklang ten goal an khung a, Aizawl FC tan James Lalruatfela-a'n penalty aṭangin a khung ve bawk. Hnahthial rawlthar Rohlupuia chu best player atan thlan a ni a, COE-in mimal lawmman paruk aṭanga panga an hui a ni.

Mizoram chhunga academy mumal taka kalpui pahnih an inkhel a, COE ruahhmanna a fuh. Team pahnih hi league round-ah 2-2 in an inhnehtawk a, hemi ṭum hian COE hian long ball hmang nasain midfield laiten hna an nghah lo. 

Aizawl FC coach Nicky Malsawmtluanga leh H. Lalnunzira ten COE chak lohna lai hriain midfield-ah an inhnawh. Chak zawk an awm lo nachungin Aizawl FC chu team ṭha zawk an ni a, final-ah pawh inrintawkna an ngah phah hle.

COE lamin Aizawl Grassroots Centre nen semifinal an khelh ṭumin an game plan ngai bawk an hmang a, Aizawl FC lamin an khingpuite khelh dan tur an zir chiang a, final hmachhawn dan tur an chiang. Amaherawchu, COE-in tum dang an nei a, final khelh hma ni li chhung chu theory leh practical-in game plan thar an zir a, an thil zir chu lei hrula ball in pass leh an khingpuite tlarhnung aṭanga ball in pass tur pressure pek nghal a ni.

COE an chungnung

Tata Trusts COE-in bul an ṭan ṭha minute 13-na lekah buai nuaih kara Aizawl FC keeper Zorinkima hnek chhuah chu Parvatui rawlthar Vanlalmalsawma (PC-a) chuan yard 25 vel aṭangin a volley lut nghal a, goal ropui khungtu PC-a hi best midfielder-ah an thlang.

COE an chungnung chhunzawm a, minute 23-naah Assam Under 14 tana khel G. Gayara chuan mual dinglam aṭangin goal dinglamah ṭha zetin a pet goal. Second half-ah COE defender F. Lalremtluanga handball vangin Aizawl FC-in penalty an hmu a, James Lalruatfela'n khungin beiseina thar an neih phah.

Amaherawhchu COE-in Aizawl FC tan chakna remchang an siam lo a, minute 77-naah Meghalaya player Emboklang chak nemnghehna goal a khung. COE-in chance ṭhahnem tak an hlah a, India Under 15 player Isac Zomuanpuia pawh bench aṭanga rawn lutin goal ban a pet per a, 3-1 in inkhel a tawp.

Tata Trusts COE hian Mualpuiah hmunpui an nei a, India technical director pawh ni tawh Colm Toal hnuaiah training an nei ṭhin. Knockout stage chinah English manager Colm Toal hi a farnu thihna vangin awm thei lo mah se an kalphung nghet tawh chu coach Bitan Singh-a'n a kalpui.

Manipur mi Bitan Singh hian AIFF hnuaiah kum 10 bawr vel zet naupang a enkawl tawh a, final-ah pawh an tawnhriat neih ṭhatna a lang. Aizawl FC coach H. Lalnunzira chuan, "Final bikah chuan kan tluk lo a ni. Pressure an rawn pe ṭha lutuk a, champion phu zawk an ni," tiin Vanglaini a hrilh.