Chhinga Veng hneh hrim hrim kan duh - Police coach

Kolasib-a MPL khelh a nih ṭumin Chhinga Vengin Mizoram Police 2-1 in an hneh a, inkhel boruak a sang. Police captain Lalfakzuala chu hnawhchhuah a ni a, inkhelh banah coach Lalbiaksanga Colney chuan Chhingcows khelh dan chu Mizo zia a ni lo tiin a sawisel.

Vawiin tlai dar 2:00 hian Chhinga Veng leh Police hi RG Stadium, Mualpuiah an inhmachhawn dawn a, Police coach BS-a Colney chuan, "Kan chak chuan semifinal kan lut dawn. Kolasib chanchin pawh kan theihnghilh lo, Chhinga Veng hi hneh hrim hrim kan duh," tiin chak an duh thu Vanglaini a hrilh.

Kolasib-ah hian Chhinga Vengin goal hnih an khung hmasa a, hemi hnu hian Police coach hian hun khawhral luiah a puh a, tun thlengin a la lawm lo. BS-a Colney chuan, "Kan goalkeeper-te chet dan hi uluk taka in thlir a nih pawhin hun an khawhral lo. Chhinga Veng keeper-te hi chuan an la khawhral a, Mizo khelh dan turah ka ngai lo," tiin a sawi a, inkhelh hma hauhin boruak a nung nghal.

Police hian second phase-ah an khingpui an la hneh vek a, tun season-a an la hneh loh awmchhun chu Chhingcows chiah an ni tawh. Amaherawhchu Chhinga Veng hian Police hi an hlau lo a, inkhelhna tur RG Stadium a nih avangin an dinhmun a ṭha zawkah an ngai.

Chhinga Veng coach Anand Gurung chuan, "RG Stadium hi chu a zau ṭha a, Police hian an khelh dan thar (defender pathum) an khelh ngam ka ring lo. An khelh dan ngaia an khelh erawh chuan khelmual a zauh avangin kan dinhmun a ṭha zawk," tiin rilru game a khel a, Police hneh nawn ngei an tum thu a sawi lang bawk.