India tan beisei a tlem

FIFA World Cup 2022 Qualifier-ah zanin hian India an inlan dawn a, an mikhualna ramah Afghanistan nen dar 7:30 hian an inkhel ang. 

Blue Tigers hian match thum an khelh aṭangin point hnih chiah an la nei a, Afghanistan lakah hian an chak zo lo a nih chuan third round inpetkai beiseina a tlem sawt dawn. India squad-ah hian Lallianzuala Chhangte chu Mizoram player awmchhun a ni a, Lunglei tlangvalin Afghanistan lakah bul a ṭan lo a nih pawhin bench aṭang tala luhtir a ni ang. 

Afghanistan hian venhimna thil avangin mahni mualah match an nei thei lo a, Tajikistan khawpui Dushanbe-ah an home match an khel ṭhin. 

Croatian coach tawnhriat ngah Igor Stimac hoin India-in World Cup qualifier bul an ṭan a, match hmasa berah 2-1 in Oman ngam lo mah se an khelh danah fans an lawm. Asian champion Qatar chu India hian khualmualah 0-0 in an inhnehtawkpui zui a, World Cup thleng tur ram meuh away-a an draw theih avangin India-in fak an hlawh zui. 

Mahse, October-ah India hian rin loh takin Bangladesh an inhnehtawkpui a, fans leh media an lawm lo - India khel a hmuhnawm lo a, Stimac ban thlengin an sawi ri! Afghanistan pawh India tan hneh theih tura ngaih an ni a, zaninah hnehna an chang zo lo a nih ngat chuan Stimac-a dinhmun a ṭha lo sawt ang tih a chiang. 

Dushanbe-ah vur a tlak avangin Indian player tan a harsa a, coach Stimac chuan a player-te tan insiamrem vat a ṭul thu a sawi - India tan game awlsam a ni dawn lo tihna a ni. 

Stimac chuan, "Game harsa tak a ni dawn tih kan hre sa a, Afghanistan hi team tharum ngah tak an ni tih pawh kan hria. Europe thlenga khel thei player nei an ni a, chona harsa tak kan hmaah a inchhawp a ni," tiin a sawi. 

October 2019-a FIFA ranking ang chuan Afghanistan hi 149-na daih an ni a, India aiin hmun 43-in an hniam zawk. Mahse, khelmuala ranking pawimawh lohzia chu Bangladesh-in India hi an lo zirtir tawh. 

India tan match 113-a khelha goal 72 khung thei Sunil Chhetri chuan, "Ranking ngaihtuah a hun lo. Ranking angin kal ila Qatar kan draw lo ang a, Bangladesh khan min draw kher lo bawk ang," a ti a, a fimkhur. 

Thil dangdai ve tak chu Afghanistan enkawltu coach Anoush Dastgir hi kum 29 mi lek a ni a, coach naupang tak enkawlna hnuaiah India hneh an beisei dawn. 

Kum 25 mi Farshad Noor hi en bik tur a ni dawn a, Dutch club ṭha PSV Eindhoven aṭanga inzir chhuak forward hian Cyprus top division club Nea Salamis Famagusta tan a khel mek a, Dutch top league-ah Roda JC tan pawha lo khel tawh a nih avangin theihna nei sang bik a ni. 

Gokulam Kerala defender Zohib Islam Amiri hi Indian club langsar Mumbai FC, Dempo SC, FC Goa, DSK Shivajians leh Chennai City FC tan pawha lo khel tawh a ni a, India rama a tawnhriat hi zanin inkhelah a pawimawh ang. 

Inkhel hi Star Sports chuan en theih turin live-in an pe chhuak dawn a, online-a en duh tan Jio TV leh Hotstar lamah a en theih dawn bawk.