Djokovic hnehin Thiem a tlang

Dominic Thiem chuan Novak Djokovic hnehin ATP Finals khelh laiah semifinal a inhlangkai a, player pariat inlan zingah group stage paltlang thei hmasa ber a ni.

Thawhlehni zan khan Roger Federer pawhin Matteo Berrettini a hneh. Swiss star leh Djokovic te hi zanin dar 1:30-ah an inhmachhawn zui leh dawn a, player ropui pahnih hian Thiem-a hnung zuia semifinal lut tur an 

chingfel ang.

O2 Arena, London-a inkhelah Thiem hian 6-7 (5-7), 6-3, 7-6 (7-5) in hnehna a chang a, match hnuhnung bera Berrettini a hmachhawn hunah chuan nuamsa leh hahdam takin a inlan thei tawh dawn a ni.

World number 2 Djokovic-a'n inkhel inhnehtawk takah tie break hmangin set hmasa a la, set hnihnaah erawh Thiem-a'n a khingpui service chhuhsakin 3-0 in hma a hruai fal a, set hnuhnung zawkah pawh a chesual zui lo. 

Austrian tlangval Thiem-a'n a ball vuak nat a chhawr ṭangkai a, vawi 51 ngawt mai winners a vaw chhuak; Djokovic (28 winners) nena khaikhin chuan a khel ṭha hle. Thiem chuan, "Hetiang inkhela hnehna chan tum hian tun hma aṭangin ka thawkrim," a ti.

A thiam zual pariat inelnaah hian Federer-a'n vawi 17 a inlan tawhah semifinal thlen loh chu vawi khat chiah a nei. Kuminah bul a ṭan fuh lo, match hmasa berah Thiem a hneh loh avangin zaninah Djokovic a hneh ngei a ngai dawn.

Grand Slam vawi 20 champion tawh hian a match hnihnaah erawh harsa lo takin Berrettini a hneh leh tawh. Group match hnuhnung ber thlir lawkin Federer chuan, "Lungngaia indawm kun hun a ni lo a, inkhel pawimawhah chuan tun aia ṭha zawk hian khelh theih ka beisei," a ti.

Wimbledon champion Djokovic tan pawh inkhel pawimawh a ni dawn, group stage a paltlang zo lo a nih chuan world number 1 ni chunga season khar theih a beiseina chu Rafael Nadal lakah a thamral zui dawn a ni.