Tlang turin France dinhmun a ṭha

Euro 2020 khel turin France chuan hmabak an ngah tawh lo, world champion hian zanin dar 1:15 hian Moldova an mikhual dawn. Didier Deschamps-a naute hian hnehna an chang a nih chuan an tling chiang tawh ang.

Group H hmahruaitu Turkey (19 points) leh pathumna nilai Iceland (15) te dar 10:30-ah an inkhel dawn bawk. Turkey pawh hnehna an chan chuan an tlang dawn, mahse an hmachhawn tur Iceland hi beisei la nei an nih avangin a awlsam dawn lo.

France leh Moldova hi kumin March thla khan a vawi khat nan an intawng a, Zimbru Stadium-a inkhelah Les Bleus lamin Antoine Griezmann, Raphael Varane, Olivier Giroud leh Kylian Mbappe te goal hmangin hnehna 

an chang.

Tunah chuan Paris khawpuia stadium hmingthang Stade de France-ah an intawng tawh dawn, team ṭha zawk leh mahni muala khel tur ni bawk France hi an chesual viau a nih ngawt loh chuan an chak a rinawm. Deschamps-a enkawl team hian Moldova bakah Pathianni zan hian Albania an hmachhawn leh dawn a, group hmahruaitu ni chunga tlang an duh a nih chuan chak a pawimawh. Chak ve ve pawh ni se inkhel dangah Turkey an chesual a nih loh chuan pahnihna an nih a ngai ang.

France tana Karim Benzema koh a ni lo hi thu thar a ni tawh lo, mahse tun hnaiah Real Madrid coach Zinedine Zidane a ṭawng chhuah vang leh Chelsea tana khelhna hmun chang lo Giroud koh a nih zel avangin sawi thar leh a ni.

Real Madrid striker Benzema hi 2015 khan ram tana a khelh pui Lyon player Mathieu Valbuena-a blackmail (tenawm zawnga pawisa laksak) tu zingah a inhnamhnawih a, a hnu lamah club tan khel ṭha mah se koh a ni tawh ngai lo. 

Zidane chuan, "Thil thleng kha a dik tak ka hre ve lem lo, ka hriat erawh Karim hian ram tana khelh a duh reng. Football aṭanga thil kan thlir a nih chuan koh tur zinga pawh a awmin ka hria," tiin a player chungchang a sawi.

Les Bleus manager Deschamps chuan ram tana a khelh pui ṭhin Zidane thusawi chhangin, "Zidane nen buaina kan nei lo, Real Madrid coach a nih angin a thusawi tur awm tak a sawi ve maiah ka ngai," a ti. Rilru thlaka Benzema koh thut tumna a neih hmel loh.

Group pakhata team paruk awm aṭangin ram pahnih chauh an tlang dawn a, hmahruaitu Turkey tan Euro 2020 khel turin point khat hmuh bak a ngai tawh lo. Iceland tan erawh beiseina nei chhunzawm tur chuan chak ngei ngei a ngai thung.

Turkey hian an mualah France an hneh a, khualmualah an inhnehtawkpui bawk avangin team ṭha an ni tih a chiang - tun ṭumah hian an rama inkhel tur an nih bawk avangin chak tura rinkai zawk an ni. Amaherawhchu, Aizawl district chunga mihring zat pawh awm lohna Iceland hian World Cup leh Euro hnuhnungah khawvel an barakhaih tawh a, tun ṭumah pawh hian huaisen takin inelna an hmachhawn ang tih 

a rin theih.