Portugal dinhmun a chiang hnai ta

Euro 2020 khel turin Portugal an la tling chiang lo a, Cristiano Ronaldo leh a ṭhianten zaninah an dinhmun chinfel theihna remchang an nei dawn. 

Portugal hian zanin dar 1:15-ah Lithuania an mikhual dawn a, hnehna an chan a, dar 1:15 veka inlan tur Serbia-in Luxembourg laka hnehna an chan zawh loh chuan Euro an inpetkai ang. Group B-ah Portugal hian match ruk aṭangin point 11 an nei a, an hnuai chiahah an khelh zat ang khel Serbia chuan point 10 an nei bawk. 

Table chung berah match sarih khel tawh Ukrainie an awm a, point 19 an neih tawh avangin an tling chiang tawh - zanin dar 10:30-ah Estonia an mikhual ve ang. 

Zanin inkhel hi Portugal tan dinhmun chinfelna remchang ni mah se an hmachhawn tur hi Lithuania an nih miau avangin chak chiang saah an dah ngam a, hei vang hian Cristiano Ronaldo pawh hahdamtir a nih rin a ni. 

Juventus forward hi AC Milan nen an inkhelh ṭumin second half ṭantirah hliam vangin lakchhuah a ni a, coach Maurizio Sarri chuan a hliam hi ngaihtuahawm a nih loh thu sawi mah se Ronaldo tan hahdam a fuh zawk ang. Ronaldo hi a inlan lo a nih chuan Wolves forward Diogo Jota chuan ram tana a match hmasa ber a khelh a rinawm a, an match hnuhnung 18-a chak nei miah lo Lithuania tan Jota ringawt pawh buaipui tham a tling dawn.

Real Madrid legend Ronaldo hian ram tan match 162-ah goal 95 a khung tawh a, inkhelh renga record siam zel duh mi a nih avangin inlan lo tur tawpa dah erawh a harsa viau tho. 

European champion Portugal hian zaninah hnehna chang pawh ni se Luxembourg-in hna an thawhsak an mamawh tel a, Luxembourg hian Serbia laka point an hlawhchhuah chuan Portugal an tling chiang ang. Zaninah Portugal leh Serbia chak ve ve pawh ni se match khat khelh tur an la hmabak ve ve tho avangin Portugal kutah engkim a la awm tihna a ni a, hlauhthawnna tur a awm lo. 

Portugal hi UEFA Nations League champion lai an ni bawk a, hei vang hian group B-ah a sang pahnih zingah tel phak lo pawh ni se playoff khelh tur an la nei dawn tho a, kawng a la inhawng zau hle tihna a ni. Mahse, coach Fernando Santos hian a hmaa an chet ṭhatna ring chunga kal a duh lo ang tih a chiang a, zaninah Portugal hian chak an tum ang - goal tam tak hmuh beisei a sual a rinawm loh.