England match 1000-na boruak a sang

Euro 2020 khel tura England-in point an mamawh zat chu point khat lek a ni a, inkhelh tur an la neih zat chu match hnih chauh a ni tawh thung. 

Three Lions hian zanin dar 1:15-ah Montenegro an mikhual dawn a, draw result ringawt pawhin nakkuma European championship khel turin an tling thei dawn tihna a ni. Wembley Stadium-a an inkhel tur hi England tan chuan international match 1000 an khelhna chiah a ni nghal dawn a, Three Lions tan hun danglam bik a ni. 

Gareth Southgate leh a naute hian hnehna nen he hun chhinchhiah tlak hi lawm an duh dawn a, beiseina sang tak nen fan-ten he hun lo thleng tur hi an thlir ang. 

Montenegro hmachhawn hma lawkin England-in chanchin lawmawm lo an nei a, Raheem Sterling leh Joe Gomez ten buaina an neih avangin Sterling hi hrem a ni. Manchester City forward hi kartawp inkhela Liverpool an ngam lohna mangchhia aṭang khan a la harh chiang lo a, Reds defender Joe Gomez-a'n chibai a tum chu kutthlak lamah a lo ṭuan!

Sterling hian squad pumpui hmaah ngaihdam a dil tawh a, social media lamah a thiam loh a nih thu a sawi tawh a, Joe Gomez nen an inkar boruak a ṭha tawh bawk. Mahse, team pumpui rem tihnain City forward hi Montenegro lakah hahchawlhna hun pek a ni a, Three Lions international match 1000-naah a inlan ve dawn lo. 

Sterling-a buaina siam chungchang ualau taka puanchhuah a ni a, chhungkaw thil chu chhung lama chinfel mai tura ngai tam tak an awm avangin Southgate-a'n sawisel a hlawh. Southgate sawiseltu langsar zingah Rio Ferdinand a tel a, England international hlui hian vun rawng inthliarna ti reh tura hma la nasa Sterling hian huat rawn a hlawh lehzual a hlau. 

Mahse, khawthlang media-ten Southgate an ṭan a, English defender hlui hian a nih tur ang takin engkim a kalpuiah an ngai. Southgate chuan, "Raheem hi kan player pawimawh tak a ni a, mahse thutlukna dik tak ka siamah ka ngai a ni," a ti. 

Buaina chhuah hnuah team meeting neih a ni a, Southgate, Sterling leh Gomez ten an ṭhiante hmaah thu an sawi. Sterling hian ngaihdam a dil a, a thiam loh takzet a nih thu a sawi. 

Sven-Goran Eriksson hunlaia England team kha 'golden generation' tia hminglem pek an ni a, a pawi ber erawh Chelsea, Manchester United leh Liverpool inhaw lutuk kha a ni. Ferdinand chuan golden generation hlawhtlin loh chhan chu club inhuatna team-a an ken luh tel vang a nih thu a sawi a, "Engtinnge Steven Gerrard emaw Frank Lampard hnenah ngaihngam taka thil ka sawi theih ang? Hlauthawnnain ka khat a, club level-ah chak loh phah nana hman ka hlau em a ni," a ti!

Lampard leh Gerrard pawhin club pathum inhalna khan team boruak a tih chhiat thu an sawi a, Liverpool captain hlui Gerrard chuan, "Kan inzah tawn em em a, mahse hmangaihna a tel lo," tiin a sawi. Chelsea manager ni ta Lampard chuan, "Chelsea player ho kan inkawm bik a, Stevie ni se Jamie Carragher nen an awm dun a, chutiang vek chu a ni," tiin a lo sawi ve tawh bawk a, club inhuatnain an ram team a ei ral. 

England legend-ten Germany, Spain, Argentina leh Brazil ten team ṭha tak an din reng chhan chu club khata khel ho an tam vang piahlamah hmun hrang hranga khel an tam vang a nih thu an sawi. Tun hnai English football-ah Liverpool leh Manchester City ten ro an rel a, tun hmaa club inhal ni lo mah se hlawhtlin duha inum team ṭha tak an nih avangin boruak khi a awm ṭan. 

Sterling-a'n chanchin a neih takah chuan English football-a inhuatna kha Three Lions team-ah put luh a ni leh ang tih hlauhna a tam a, City leh Liverpool ṭantuten vengthawngtu an ngah. England hian Liverpool aṭangin Gomez, Trent Alexander-Arnold, Jordan Henderson leh Alex Oxlade-Chamberlain an nei a, City player Sterling leh John Stones an awm bawk. 

England boss Southgate chuan, "Ka player-te hi ka hmangaih em em vek a, chhungkua ang mai kan ni. Chhungkuaa pawimawh ber chu harsatna te inhrilh tawn a, theihtawp chhuah tlan a ni," a ti. Southgate hian eng ang pawhin an inlungrual thu sawi tam mah se mipuiin an tehna tur chu khelmual chhungah a ni tho tho a, an chet chhiat hlekin Reds leh City inhuatna sawichhuah a ni zel ang. 

Chu thil a thlen loh nan chuan zaninah England hian team inthurual tak an ni tih an pholan a ṭul a, an mamawh zat hi point khat lek ni mah se fan-ten point thum hlawh chhuak lai hmuh an duh dawn. Three Lions hi group A-ah awmin match rukah point 15 an nei mek a, Pathianni zanah Kosovo an lenchilh leh dawn avangin hlauhthawnna nei loin an khel ang. 

England squad aṭangin Fabian Delph chu hliam vangin a inhnukdawk a, kum 29 mi Everton midfielder aiawh tur hi he thu buatsaih a nih thleng hi chuan an la puang lo. 

Liverpool midfielder Jordan Henderson chu squad-ah tel mah se hrem vangin zaninah a inlan a rem dawn lo a, Chelsea midfielder Ross Barkley chu a lo inhnukdawk tawh bawk. Barkley hmun ruak luah tur pawh thlan an ni hran lo a, hetihlai hian hliam vang thoa inhnukdawk Tom Heaton hmunah Sheffield United goalkeeper Dean Henderson koh a ni thung. 

Dean hian Manchester United aṭangin Sheffield-ah hian loan-in a khel a, match hniha pakhat zawkah tal a inlan a nih pawhin Three Lions senior team tana a match hmasa ber a ni ang.