Police-in Chhinga Veng an draw

Mizoram Police-in Kolasib-a an hneh loh Chhinga Veng hneh tum viau mah se, nimina RG Stadium-a inkhelah a draw-tu zawk an ni.

RG Stadium-a MPL khelh hmasak berah Chhinga Vengin MC Malsawmzuala hmangin hma an hruai a, Police-in captain Lalfakzuala hmangin second half-ah an sut a, 1-1 in inkhel a tawp.

Inkhelh hmain Police thawm a ring a, khelmualah erawh Chhinga Veng an inhrosa hmasa zawk. Chhingcows striker MC-a'n minute ngana lekah freekick aṭangin a khung a, inkhel an thunun bawk. Siaha tlangval MC-a hian goal dang khungna hun ṭha a nei a, keeper F. Lalmuanawma chiah a hmachhawn hnuah a khung lo. Ni sa hnuaiah game a nung tawk lo a, Chhinga Veng an khel ṭha zawk.

Second half inkhel kalhmang a dang ta daih. Police rawn che ṭha nghalin Chhinga Veng tlarhnung an buai. Minute 65-naah Malsawmfela'n Chhingows tlarhnung a chhaih buai hnuah Fakzuala tan a pe a, Police captain-in goal kilah lei hrulin a khung.

Police-in  goal dang an khung mai a rinawm a, amaherawhchu Chhinga Vengin uluk takin goal an veng ve tlat. Lalbiaksanga Colney hoten chak an duh vangin goal venhim an ngaihthah a, Chhingcows tlarhmain counter attack aṭangin vawi thum zet khungna hun an nei - foreigner Ouattara Sie tiamin an hun ṭha an bawhpelh.

Police lam tan substitute Lalsang-bera'n chance ṭha bik a hlah a, keeper Dharminder Singh zawnah chiah a pet a, goal dang hmuh tur a awm tawh lo.

Chhinga Veng coach Lalremruata chuan, "First half-a kan chance hlah kan tuar a, chutih rualin second half-a Police khelh dan thlir chuan draw hi result ṭha a ni," tiin a sawi. Mizoram Police coach Lalbiaksanga Colney chuang, "Ni a sa deuh a, team pahnihin kan theihna angin kan khel thei lo. Kan inhnehtawk avangin Chhinga Veng hi kan hnuaiah an awm chhunzawm a, semifinal lut turin kan dinhmun a ṭha viauin ka hria," tiin Vanglaini a hrilh.