Chanmari vs Chawnpui

Mizoram Premier League Season 8 chu vawiin hian RG Stadium, Mualpuiah khelh a ni leh dawn a, tlai dar 2:00-ah Chawnpui FC leh Chanmari FC te an inhmachhawn ang.

Chanmari tan semifinal khel turin chak ngei a pawimawh a, Chawnpui tan pawh MPL khel zel turin point thum hlawh chhuah a ṭul bawk.

Chanmari FC-in an match hnuhnung berah Chhinga Veng hneh lo mah se tun ṭumah hian chak turin an dinhmun a ṭha zawk. Chawnpui FC-in RG Stadium-ah vawi khat mah training an neih loh laiin Chanmari erawhin training nan an hmang tam thung.

Player thlir pawhin Chanmari hi team ṭha zawk an ni a, Kolasib-a an inkhelah pawh 3-2 in hnehna an chang. Chanmari FC manager Lalhmangaiha Sailo (Angaiha) chuan, "Chak ngei ngei kan mamawh a, match thum khelh hmabakah hian point kua pawh hmu ila Electric Vengin point kua an hmuh ve tho chuan tla thei kan ni. Kan dinhmunin a zir loh avangin chak tumin kan khel dawn a, team boruak a 

ṭha a, kan chak ngei pawh ka ring," a ti.

Inkhelhna hmun tur thlirin Angaiha chuan, "Lammual hi chu a te hret a, grass a ṭha tawh lo bawk. Hei vang hian season tir aṭang pawhin RG Stadium-ah MPL khelh ni se tih hi kan duh dan a ni a, ground ṭha taka kan khel tur hi a phurawm hle," tiin Vanglaini a hrilh.

Chawnpui hian an elpui ber Ramhlun North lakah point ruk an chân a, heti chung hian an beidawng lo. Coach thar Laldinthara hnuaiah 'upset' thlenin an match hnuhnung berah Electric Veng an hneh a, Chanmari tan pawh fimkhur a ṭul ang.

Chawnpui coach Thara chuan, "Goal venhim hi  kan tana pawimawh hmasa ber a ni a, kan player neih pawh kan hre chiang. Game plan kan nei a, kan ngaih pawimawh chuan Electric Veng kan hneh thei a, Chanmari nen pawh kan game plan kan rin ngam vek a ṭul a ni," tiin Vanglaini a hrilh.

Coach thar Thara hian thutlukna huaisen a siam a, I League club tan pawha khel tawh T. Lalnunpuia (Bawihpuia) chu bench-ah a dah ngam. Chawnpui coach chuan, "Bawihpuia pawh a ṭan phah khawp mai. Chanmari nen chuan a khel tawh ang," tiin a sawi.

Round 12

Vawiin Inkhel Tur - RG Stadium

Chawnpui FC    02:00 PM    Chanmari FC

November 16, Inrinni - Lammual

Ramhlun North    04:00 PM    Electric Veng FC

Aizawl FC    07:00 PM    FC Venghnuai