Kan lawm e, Zlatan!

Zlatan Ibrahimovic chuan nimin khan LA Galaxy a chhuahsan tur thu a ti chiang ta a, kum 38 mi striker hian a kalna tur sawi rih lo mah se Italian club AC Milan leh Bologna hming a ri ring hle. 

Swedish striker chuan, "Zlatan in duh a, in duh chu ka pe ta che u a ni. In lawmnaah ka lawm e," tiin social media lamah LA Galaxy a chhuahsan thu a puang a, "Ka tel lohna MLS-in ngaihven a hlawh zui lo ang," titu hian, "Tunah chuan baseball in en thei leh ta," a ti zui!

Ibra chuan, "Ka lo kal a, ka thil hmuhte chu ka thuhnuaiah ka dah a ni. LA Galaxy, beiseina thar min pek leh avang khan in chungah ka lawm e," a ti a, March 2018-a a pan US club tan hian match 53 bul a ṭanah goal 52 a khung. 

LA Galaxy president Chris Klein chuan, "LA a lo pan hnuah Los Angeles khawpuiah nasa takin football-in hma a sawn a, team tana a hnathawh leh beihna avangin kan lawm a ni," tiin a sawi.