Romania vs Sweden; Finland tan zan duhawm?

International break a ni a, zaninah Euro 2020 qualifier khelh chhunzawm a ni dawn - zan dar 1:15-a Romania leh Sweden inkhel tur hi ngaihven hlawh fal a ni a, mipui rilru luahtu a ni. 

Sweden hian Romania an hneh a nih chuan Euro 2020 khel turin an inpet kai dawn a, Romania hian Sweden an hneh a, Thawhṭanni zana Spain an hneh leh a ngai thung ang. Team langsar ni lem lo inkhel turah zanin dar 10:30-a Finland inlan tur hi ngaihven hlawh a ni a, Leichtenstein hi an hneh a nih ngat chuan an ram chanchina a vawi khat nan major tournament an khel dawn tihna a ni. 

Group D hi a group ang zawng chuan 'hot' ber tia sawi ngam a ni a, Republic of Ireland (12 pts), Denmark (11) leh Switzerland (11) te an inhlat loh avangin tlang thei dinhmunah vek an la ding. 

Group F aṭangin Spain chu Euro khel tura tling chiang tawh an ni a, zanin dar 1:15-ah Malta an mikhual dawn - eng result pawh thleng se an dinhmun a nghing pha tawh lo. 

Spain hian match riat aṭangin point 20 an nei a, an hnuaiah hian match riat tho khelin Sweden (15 pts) leh Romania (14) an awm - zaninah an inkhel dawn! Sweden hian hnehna an chan chuan Romania tan umphak theih an ni tawh dawn lo a, an tling chiang ang. Sweden player-ten hei hi an hrechiang dawn a, thih tha nen an bei ang. 

Romania tan Sweden hneh chu hna hmasa a ni a, match lehpekah Spain hneh a ngai bawk ang. Sweden hneh ringawt mah se Spain an hneh zui loh chuan an tan kawng a tlem dawn - Sweden hmachhawn leh tur hi Faroe Islands an ni tlat. 

Romania team an inkhai rual ṭha a, tlarhmaah Bulgarian club Ludogorets Razgrad tana khel Claudiu Keseru leh Reading forward George Puscas te hi an chhuanvawr tur an ni dawn. Claudiu Keseru hian qualifier-ah goal ruk a khung tawh a, Puscas hian goal nga a khung tawh bawk. Sweden-in an match tawp berah hlauthawng chunga an khelh loh nan striker pahnih dan dan hi an ngaihtuah a ṭul ang. 

Sweden-in Zlatan Ibrahimovic hunlai angin player langsar vut an nei tam lo a, mahse 'team work' hi an inchhuanna chu a ni - goal li khung tawh Robin Quaison a ṭangkai ang. Kum 33 mi Marcus Berg, ram tana vawi 117 inlan tawh Sebastian Larsson, Sampdoria midfielder Albin Ekdal leh kum 34 mi captain Andreas Granqvist te tawnhriat hi boruak sangah a ṭangkai dawn a, RB Leipzig midfielder ṭha Emil Forsberg leh Manchester United defender Victor Lindelof te hi ṭangkai tur an ni dawn bawk.

Group J aṭangin Italy chu Euro 2020 khel tura tling chiang tawh an ni a, dar 1:15-a Bosnia & Herzegovina nena an inkhel tur hi coach Roberto Mancini tan chuan player enchhinna mai a ni tawh ang. 

Mahse, an hnuai chiaha awm Finland tan chuan zanin inkhel tur hi an ram football chanchina thil ropui ber thlen zan a ni thei a, Liechtenstein an hneh chuan a vawi khat nana major tournament khel turin an tling dawn! Zanin dar 10:30-a inlan tur Finland hian draw result ringawt hlawh chhuak pawh ni se Italy-in Bosnia an hneh chuan an la tlang thei dawn tho a, an mikhual tur Liechtenstein hi match riata chak la nei miah lo an nih avangin an hneh a rinawm mah zawk. 

Norwich City striker Teemu Pukki hi tlarhmaah chhuanvawr a ni a, tun qualifier-ah ringawt goal sarih a khung tawh! Goalkeeper Lukas Hradecky hi Bayer Leverkusen tana khel phak a ni a, Liechtenstein tlarhma tan paltlang a beiseiawm loh. 

Zanin dar 1:15-ah Denmark-in Gibraltar an mikhual dawn a, hetih hunah vek hian Switzerland chuan Georgia an mikhual dawn bawk - Denmark leh Switzerland hian hnehna an chan ve ve chuan a chung bera awm Ireland dinhmun a chhe sawt ang. 

Ireland hian point 12 nei mah se match sarih an khel tawh a, Denmark leh Switzerland aia match khata an khelh tam avangin zaninah pawh an inlan dawn lo. Mahse, Ireland hian vanneihna an nei - Denmark hi Thawhṭanniah an la hmachhawn dawn. Chumi awmzia chu Denmark hian hnehna chang pawh ni se Thawhṭannia Denmark hi an lo hneh let chuan an tling daih thei. 

Chutihrual chuan Switzerland-in Georgia leh Gibraltar aṭanga point li tal an hmuh a, Denmark an chak bawk chuan Thawhṭanni zanah Ireland hi si hnih fai tala an chak a ngai dawn thung - Denmark hi an chak a, Switzerland an chak loh chuan Denmark an tlang nghal ang.