Quarterfinal-ah Srikanth a lut

Badminton inelna Hong Kong Open khelh laiah Kidambi Srikanth chuan nimin khan quarterfinal a in vaw kai a, kumin April thlaa Singapore Open quarterfinal a luh hnuah a thiam pariat zinga a tel lehna hmasa ber a ni hial.

World number 1 hlui Srikanth hian amah anga Indian tlangval ve tho Sourabh Verma chu second round-ah 21-11, 15-21, 21-19 in a hneh a ni. A match hmasa zawka a hmachhawn tur Kento Momota a inhnuhdawh avangin tun ṭum hi a vawi khat inlanna chauh a ni.

Srikanth hian a match lehpekah chuan Rio Olympic champion Chen Long a hmachhawn leh dawn. Chinese tlangval Chen hi kuminah che ṭha tak ni lo mah se a thleng sang pawl a ni deuh zel a, khingpui harsa tak tur zinga mi a ni ang.

Inkhel dangah Indian shuttler H S Prannoy chu seeded parukna Jonatan Christie lakah 12-21, 19-21 in a chak lo, Indonesian tlangval hian a tir aṭanga a tawp thlengin inkhel a thunun tluan chhuak zak a ni.