Nakkum January-ah PBL

Badminton Association of India leh Sportzlive tena an buatsaih tur Premier Badminton League (PBL) chu nakkum January 20 aṭanga khelh tur a ni leh dawn a, inelna hian February 9 thleng a awh ang.

PBL hi season dang ang bawkin khawpui hrang hrangah khelh kual a ni leh dawn, khawpui pali - Chennai, Delhi, Lucknow leh Bangalore te chuan inelna hi an thleng dawn a ni. BAI president Himanta Biswa Sarma chuan, "India hian khawvel badminton kan luah hneh chho zel a, tunah meuh chuan world champion PV Sindhu kan nei tawh, Sai Praneeth pawh world championship-a mipa singles huangah kum 36 hnua a vawi khat nan India tlangval medal la thei hmasa a ni.

"Ram dangin hma an sawn ang bawkin keini pawhin hmasawn kan duh, tuna kan inelna tur pawh hi sum tam tak senna tur ni mah se player-te hmasawnna tur a nih avangin keini chuan a hlawk kan ti," a ti. Badminton inelna zinga sum tamna ber PBL atan hian player-te chu lilam an ni leh dawn a, lilam hun tur erawh tih chian a la ni lo thung.