Aizawl FC - Ni 35 chhungin match 11

Football hunpui a inṭan chho dawn a, India rama football inelna lian I League pawh RG Stadium-ah khelh a ni dawn. Mizoram chhunga football inelna lian ber Mizoram Premier League a kal pah reng bawk ang a, football ngainatute tan chuan hun duhawm a ni.

MPL club ṭha Aizawl FC hian Premier League club ṭha Liverpool te tawn ang tawng chho vein fixtures hautak an hmachhawn dawn. MPL Board-in duhsak taka an fixtures an tihdanglam sak chungin ni 35 chhungin match 11 khel thei dinhmunah an ding. Standly Rosario hote tan hmabak a hautak dawn hle.

Aizawl FC hian tun Inrinni hian MPL kai thar FC Venghnuai an hmachhawn dawn a, Chhinga Veng nen November 18, Thawhṭanniah an inkhel leh nghal ang. November 22, Zirtawpniah Chanmari FC an hmachhawn ang a, MPL league round chu a zo dawn.

Ni sarih chhungin Aizawl FC-in MPL league round an khel zo dawn a, tunah hian point 24 hmu tawhin semifinal an thleng tawh - league match pathum hi chu ‘pressure’ awm loin an zo thei ang. Chutih rualin table-a an dinhmun azirin semi final-a an khingpui a dang daih thei. Standly Rosario-a'n club tana ṭha ber a duan aṭul ang.

I League fixtures a chhuak a, Aizawl FC hmachhawn hmasak ber tur chu India ram club hmingthang Mohun Bagan an ni. Mizo club hian Mariners hi November 30, Inrinniah a mikhual dawn a, tualchhung football ngainate chuan nun hlui an thlir kir nghal ang.

April 22, 2017-a thil thleng kha kan hre reng thei lo a nih pawhin theihngilh a har tawh ang. RG Stadium-ah Aizawl FC-in Mohun Bagan an mikhual a, team pahnih hi champion thei dinhmunah an ding. Kolkata club hian Bengalaru FC  laka an lallukhum hloh laklet ngei an tum ruh hle. Mizo mipui erawhin I League nomawi chawi thei zinga Aizawl FC an awm chu mak an ti a, mumang ram ang vek a tling thung.

Mizo mipuiin mumang ram aṭanga ṭhangharh an duh lo a, inkhel pawimawh ni takah ruahsur vangin Mualpui pan hrehawm mah se Mizo club ṭan tura kal tumte a dal zo lo. A ngaihnawm lai chu ticket zo rang lutuk kha a ni a, gallery lama ticket a zawh vek avangin Rs 100 man ticket - mual sira din theihna an siam belh hial.

Bagan tan Mizo chhuanvawr Jeje Lalpekhlua a rawn inlan a, RG Stadium leng lo Mizo mipui karah Mariners ṭantute kil khatah an awm khawm. Inkhel boruak a sang a, inkhel lah a hmuhnawm. Mizo tlangval Zohmingliana Ralte-in minute 83-naah goal pawimawh bik a khung a, mipui au thawm vangin RG Stadium a nghing rum rum a, ngaihtuah let zawng pawha hmul thi la ding tawk an tam ang. Kumin I League-ah thawnthu hlui her lum a ni dawn a, Aizawl FC hian he inkhel pawimawh atana inpuahchah nan ni sarih zet an nei a, Bagan hneh an tum dawn.

MPL1 kan thlir kir chuan champion tura rinkai chu Mizoram Police an ni a, he mi season hian league match 14 khelh zawha point hmu sang ber an champion - final siam a la ni lo.

Police hian season bul an ṭan ṭha a, amaherawhchu All India Police Meet an khelh avangin an rawn let hnuah ngai an awh tawh lo. Tawnhriat nei ṭha T. Vanlalhluna leh HC Zarzoliana hoa khel Dinthar FC-in Police hi an lehthal a, football history-a chuang reng turin MPL champion hmasa ber an ni.

Aizawl FC pawh hian ruahmanna an neih ṭhat a ṭul dawn hle. I League fixtures avangin an hah belhchhah dawn. Mizo club hian Mohun Bagan an hmachhawn zawhah MPL semifinal an khel ang a, chumi zawh chuan Neroca hmachhawn turin Manipur an pan dawn a, India Arrows nena inkhel turin Goa an pan zui a ṭul dawn. 

Standly Rosario hote hian Goa aṭanga an rawn kir hnuah MPL semifinal second leg an khel leh dawn a, an khingpui tur la chiang lo mah se Goa leh semifinal inkarah ni khat chauh an chawlh dawn avangin a harsa dawn tih erawh a chiang hle. 

Chutih rualin Aizawl FC fixture vangin MPL Board lam dem theih a ni lo - MPL lama I League club khingpui tur lam hi hriatthiam tel a ngaih avangin Aizawl FC tana remchang bik ringawt zawn theih a ni lo a, MPL-a an khingpui tur lam tana remchang zawn tel a ngai.  

Aizawl FC coach Standly chuan, "Pre season hi a pawimawh a, Aizawl FC hian inelna ṭan hmain training ṭha tak kan nei a, MFA Super Cup kan tel lohna chhan pawh a ni. Tuna kan fixtures pawh hi a hautak a, kan tih theih ngei pawh ka ring. Chutih rualin Mizo mipui hian kan fixtures pawh hi min hriatpui se ka duh. A bik takin MPL semifinal second leg hi a harsa dawn. Goa-ah December 9 zan dar 9:00 velah inkhel kan zo ang a, December 10-ah kan rawn thlawk haw ang a, December 11-ah semifinal kan khel lehnghal dawn. Ruahmanna siam pawh a harsa khawp ang," tiin Vanglaini a hrilh.

A êng zawnga thlirin Mohun Bagan leh Lajong coach hlui Standly Rosario chuan, "A harsat thu kan sawi vak vak hian eng nge awmzia awm? Chona duhawm takah ngai mai ila, Aizawl FC leh Mizo mipui tan kan theihna zawng zawng hlanin kan khel ang a, result ṭha ber neih kan tum ang," tiin a sawi.