Rafael Nadal a tho chhuak

ATP Finals khelh laiah Rafael Nadal chu hneh nei loa tla mai thei dinhmunah a ding hman a, mahse Spanish tlangval hian huaisen taka bei letin Daniil Medvedev a hneh.

Nilaini zan O2 Arena, London-a inkhelah world number 1 Nadal hi set hnuhnung berah 5-1 ngawtin a hnufual hman. Amaherawhchu, seeded palina Medvedev-a'n match point a hmuh tawh chu pawt thlain 6-7 (3-7), 6-3, 7-6 (7-4) in 

hnehna a chang.

An group inkhel dangah Stefanos Tsitsipas chuan Alexander Zverev 6-3, 6-2 in a hneh ve bawk a, Greek tlangval hian ATP Finals a vawi khat khelhnaah match hnih chak nghalin semifinal a inhlangkai. Grand Slam vawi 19 champion tawh Nadal hian a group match hnuhnung ber atan zanin dar 7:30 hian Tsitsipas a hmachhawn leh dawn a, semifinal lut tur chuan hnehna a chan ngei ngei a ngai dawn.

Kum 33 mi Nadal chuan, "Ka vannei, Daniil a vanduai thung. Match tawp lamah khan kawng hrang hrangin ka vannei. Tournament ṭha taka khar tur chuan hmasawn ka mamawh hle," tiin a sawi. World number 1 ni chunga season khar tur chuan Nadal hi a kutah engkim a awm, semifinal lut lo pawh ni se match khatah hnehna a chan leh chuan a elpui Novak Djokovic tan ranking lama tlan pel tur chuan champion a ngai ang.

Group Andre Agassi aṭangin Tsitsipas a tlang tawh a, player dang pathum Nadal, Zverev leh Medvedev ten semifinal luh beiseina an la nei vek, group match hnuhnung berah chinfel a ni dawn.