FIFA hotu thar Arsene Wenger

Arsene Wenger chu FIFA Chief of Global Football Development atan ruat thar a ni. Nilaini zan khan FIFA president Gianni Infantino chuan an hmunpui Zurich-ah Wenger hi a lawm lut.

Arsenal manager hlui Wenger hi tun hnaiah team enkawl leh tur angin a thawm a ring. German champion Bayern Munich nen pawh sawi zawm a hlawh hle, mahse tunah chuan player enkawl lam aiin thuneitu sang dinhmun a chelh dawn ta a ni.

FIFA president Infantino chuan, "Arsene Wenger hi a finna leh inpekna vangin football khawvelah chuan mi zah kai berte zinga mi a ni. FIFA ka kaihhruai tirh aṭang khan football chu kan thupui ber a ni a, chumi tura Arsene kan hnena a rawn kal hi ka lawm hle," a ti.

French pachal Arsene Wenger hi a thluak a fimin football hmangaihtu a ni a, a chhehvela thil thleng leh boruak inthlakin a ti danglam ve ngai meuh lo - tum mumal nei leh mi remhria, lehkhathiam a nih bawk avangin a hming lemah pawh 'Le Professeur' tih a ni ṭhin.

A hna tharah hian khawvel pumah mipa leh hmeichhe football hmasawnna kawnga kaihruaitu lu a ni dawn a, technical lamah pawh thuneihna sang tak a nei tel bawk. A pawimawh tak zinga pakhat erawh coaching lam a ni.

Wenger hian coach-te kaihhruaina hna a thawk tel dawn a, professional player zinga coaching lam luhchilh tur kaihhruai leh kawng kawhhmuhtu pawimawh a ni dawn - manager leh technical lam inkara palai pawimawh a ni bawk ang.

Football and Technical Advisory Panels-ah member a nih nghal bawk avangin dan leh hrai kenkawh leh thutlukna siam chungchangah thuneihna a nei nghal. Kum 1966 aṭanga kalpui tawh FIFA Technical Study Group-ah chairman ni telin mawhphurhna a koah an nghat hnem hle.

Arsene Wenger hian season 22 zet a chamchilh hnuin Arsenal chu nikum May thla khan a chhuahsan a, North London club hi Premier League nomawi pathum a chawipui bakah FA Cup-ah vawi sarih a champion pui - khawvel manager ropui zinga mi a ni.

Tunah chuan Wenger hi kum 70 mi a ni tawh, coaching lamah kir tur anga sawi ni mah se tunah chuan hna dang a chelh ta zawk - nakin zelah pawh team enkawl hna a thawh chhunzawm a rinawm ta chiah lo. Wenger chuan, "He hna pawimawh ka chelh tur hi ka phurin ka lawm bawk. Thlirna hran aṭanga football lo en ve hi ka chak zawng pakhat a ni a, FIFA phei chu khawvel huap a nih avangin a phurawm hle.

"FIFA hian tun hnaiah kawng hrang hrangin hma a la a, hmachhawp leh tih tur ṭhahnem tak a nei mek bawk. Football hmasawn zel nan hian kei pawhin FIFA kaltlang hian tha ka thawh ve ngei ka beisei," tiin a sawi.