Palinaa awm Chanmari an nghing

Mizoram Premier League-a knockout stage a awm tirh aṭanga la tling ziah Chanmari FC chu nimin khan Chawnpui FC-in an chelh a, point khat vangin palinaah awm chiah mah se a vawi khat nan semifinal khel lo thei dinhmunah an ding.

MPL-a vawi hnih champion tawh Chanmari hian Aizawl FC leh Ramhlun North te an la hmachhawn dawn a, an chak ve ve a nih pawhin Electric Veng leh Chhinga Veng result-ah an hmalam hun a innghat tawh ang. Chawnpui FC erawh point khat hlu tak avangin Ramhlun North point hmuh zat an hmu chiah a, MPL khel zel turin beiseina a nung zel.

Chanmari FC-in chak tumin bul an a ṭan a, MS Dawngliana ball pass ṭha chu Lalremruata'n (Bata) chang fuh mah se keeper Vannunmawia'n ṭha zetin a dang. Champhai tlangval Nunmawia hian Dawngtea penalty pet a dang a, hei hi danglamna thlentu a ni.

Second half-ah pawh Chanmari forward Lalremruata'n keeper Nunmawia chiah a paltlang thei lo a, Lalnunzama goal khung tur pawh Chawnpui keeper thoin a dang. Hun tawp hma hretin Dawngtea'n a tihsual thupna hun ṭha a nei a, amaherawhchu Bawngkawn tlangval hian a khung thei chuang lo.

Chawnpui keeper Vannunmawia vangin Chanmari dinhmun a nghing a, MPL history-a sulhnu nei ṭha ber zinga mi hian semifinal a thleng ta lo a nih chuan Chawnpui nena an inkhelh hi an hriat chhuah leh tur a ni ang.

Chawnpui FC-in coach thar Laldinthara hnuaiah hmasawnna an hmu chho zel a, Electric Veng an hneh hnuah Chanmari FC an chelh. Ramhlun North ṭum hnih hneh loh vanga MPL aṭanga tla mai tura ngaih Chawnpui hian beiseina thar an nei leh tawh.

Chawnpui hian anni aia point thuma hmu tam FC Venghnuai an la hmachhawn dawn a, season tawp lamah relegation battle a nung thar dawn niin a lang. Coach Thara hote hian an match hnuhnung berah Mizoram Police an hmachhawn dawn a, hetah hi chuan Lalbiaksanga Colney hoten semifinal ticket an neih a rinawm tawh avangin point hmuh hi thil theih tak a ni tawh ang.