Goal khung tura piang Ronaldo

Portugal captain Cristiano Ronaldo chuan ram tan hattrick a siam leh ta a, Euro 2020 qualifier-ah an mikhual Lithuania chu 6-0 ngawtin an sawp. 

Ronaldo hian minute sarihna lekah penalty aṭangin goal hmasa ber a khung a, goal hnih dangin a chhunzawm. Pizzi, Goncalo Paciencia leh Bernardo Silva te chuan goal khat ṭheuh an khung bawk. Kum 34 mi Ronaldo hian ram tan match 163-a khelhah goal 98 a khung ta a, international football-a goal khung hnem ber Iran legend Ali Daei (109 goals) um phak turin goal 11 bak a mamawh tawh lo. 

Juventus boss Maurizio Sarri-a'n a match hnuhnung pahniha a lakchhuah Ronaldo hi a khup hliam vanga a inlan loh mai a rinawm a, mahse hattrick a siam ta zawk. Portugal boss Fernando Santos chuan, "Ronaldo dinhmun hi ka ringhlel ngai lo a, midang zawk hi an buai mai mai a ni. Cristiano khelh danah mak tih ka nei lo," a ti zui. 

Group B inkhel dangah Serbia-in 3-2 a Luxembourg an hneh avangin Portugal an la tling chiang lo a, Pathianni zan dar 7:30-ah Luxembourg an hneh chuan Euro 2020 an inpetkai ang. Serbia tan hian Aleksandar Mitrovic chuan goal hnih a khung a, Portugal hi an chak zawh loha Ukraine an hneh chuan an tlang ang - Pathianni zan dar 7:30-a an tum tur Ukraine hi an tling chiang tawh.