Aizawl FC-in thawhchhuah an tum
I League club Aizawl FC-in Mizoram Police laka 5-1 a hma an hruai a, 6-5 in an lehthal. Standly Rosario hote hian zanin dar 7:00 hian FC Venghnuai an hmachhawn dawn a, hmahruaitu ni zel turin chak ngei an tum.
Aizawl FC coach Standly Rosario chuan, "Kan khelh dan kan en let a, kan insiamṭhaah chuan kan ngai. FC Venghnuai hi thawhchhuahna atan hman kan tum a, chak ngei kan tum," tiin Vanglaini a hrilh. I League club hian Mizoram Police an hmachhawn hmain match 10-ah goal thum chiah an chhuah a, match riatah an goal-ah an chhuah lo. Amaherawhchu Mizoram Police an hmachhawn ṭumin goal ruk ngawt an chhuah a, MPL8-a a vawi khat nan an chak lo.
Aizawl FC hian Venghnuai hi kumin I Day Football semifinal-ah an hneh lo a, MPL-ah erawh I League club hian 3-0 in hnehna an chang. MPL kaithar hian point 11 an hmu a, match thum chauh khelh tur a awm tawh avangin semifinal kawng a zim tawh hle.
Chutihrualin Venghnuaiin ṭan chhan tur an nei a, an hnuaia awm Ramhlun North leh Chawnpui te nen an inthlauh tawh loh avangin tla thei dinhmunah an ding. Coach Rindika Hmar chuan, "Point hmuh kan mamawh a, inkhel dang result milin kan khel ang," tiin an hmaa inkhelin an khelh dan tur a nghawng thu a sawi.