Hamilton a inngaihtuah dawn

Lewis Hamilton chuan Formula 1 huangah hun hman chhunzawm a la tum a, mahse contract thar ziak tur erawh chuan hun eng emaw ti chhung inngaihtuah a duh thu a sawi chhuak.

British driver hi Mercedes car a khalh chinah a chungnung hle a, US Grand Prix an tlan chiah khan driver champion a nihna pawh a nemnghet tawh - a team pangngaiah hian awm chhunzawm tura ngaih ni mah se a la chiang leh ta rih lo.

Kum 34 mi Hamilton chuan, "Team pakhatah hun rei tak kan awm khawm tawh a nih chuan a vawrtawp kan thleng tawh hi a lo ni ṭhin. A chang chuan kan hma hun lo awm zel tur ngaihtuah a ngaih chang a awm. "Eng hi nge tih leh kan tum a? Eng nge hmachhawp kan neih? tih inzawta ngaihtuahna fim taka hman a ngaih chang a awm a ni," a ti. 

Hamilton hian Mercedes team tan 2020 season thleng daih contract a nei mek a, tun season chhung khan che ṭha viau mah se an elpui Ferrari car ṭhat leh chak thu a sawi fo avangin a team lam tan chuan hriat nuam a ni lo ang.