Lorenzo a chawl dawn

Jorge Lorenzo chuan Pathianni zana Valencian Grand Prix an tlan zawh hunah Moto GP chawlhsan a tum thu a sawi a, bike intlansiakna sang berah hian vawi khat bak a inlan dawn tawh lo tihna a ni.

Spanish rider hian 2010, 2012 leh 2015 khan Yamaha bike khalh chungin Moto GP title a lo la tawh, 2006 leh 2007 khan 250cc huangah a lo chungnung ber tawh bawk - khawvel rider ropui zingah a tel phak.

Kum 32 mi Lorenzo hian 2008 khan MotoGP a luhchilh ṭan a, intlansiak vawi 27 zetah hnehna changin; hnehna chan hnem lamah pangana dinhmun a luah hial - inelna vawi 202 a hmachhawn zingah ṭum 114 chu podium a lawn phak a ni.

A chawlh tur thu sawiin Honda rider Lorenzo chuan, "A hun chu a lo theng ta, tun ṭum hi MotoGP huanga ka inlanna hnuhnung ber chu a ni tawh dawn, intlansiak zawh hunah professional racer ka nihna aṭangin ka chawl nghal ang," a ti.

June thla khan Assen Grand Prix tlan tura an inbuatsaih laiin Lorenzo hi a chesual a, hei vang hian intlansiak paliah a inlan thei lo. A dam hnuah pawh beisei a phak thei mai tawh lo a, a kum a tam tawh bawk avangin atan chawlh hi thutlukna dik a ni ang.