Beisei phak lo India talbuai

FIFA World Cup 2022 qualifier-ah India-in beisei an phak lo chhunzawm zel a, Ningani zan khan Afghanistan nen goal khat ve ve khungin an inhnehtawk. 

Blue Tigers hian inkhel hun tam zawk chu si phurin hun an hmang a, mahse bench aṭanga luhtir Seiminlen Doungel chuan hun pek belhah si phurh sutin India an vannei. Seiminlen-a'n India tana goal a khung vawi khatna a ni a, hnehna chang zo lo mah se Manipur tlangval tan erawh zan chhinchhiah tlak a ni. 

India hian match thum an khelh aṭangin point thum chiah an la nei a, an match hmasa bera Oman an ngam loh hnuin Qatar, Bangladesh leh Afghanistan an inhnehtawkpui ta. 

India coach Igor Stimac-a'n Bangladesh laka draw result hlawh chhuak starting XI aṭangin Anirudh Thapa leh Manvir Singh chu bench-ah a dah a, a nu thihna avanga haw Anas Edathodika a awm lo bawk. 

Thapa aiah Pronay Halder chuan bul a ṭan a, Manvir Singh aiah Brandon Fernandes luhtir a ni thung - inkhelhna hmun Dushanbe-ah khua a vawh avangin India hi talbuai tura rin sa an ni. Blue Tigers hian nawr tum viau ṭhin mah se an ti hleithei lo a, tlarhmaah Sunil Chhetri chu player langsar la ni reng mah se thlawptu nei ṭha tawk lo striker a tal hleithei bik lo. 

First half hun pek belhah Afghanistan hian goal hmahruai an rawn khung ta nge nge a, Australia second division club Western Pride tana khel Zelfy Nazary chuan an hun ṭha neih goal-ah a rawn chantir. 

Stimac-a'n tlarhmaa Chhetri thlawp tura a dah zingah Ashique Kuruniyan chuan phai lam media sawi ang ema player ṭha a ni lo tih a lantir a, mual sir aṭangin hlauhawm a thlen hleithei lo. Udanta Singh theihnaah rinhlelh tur awm lo mah se Bangladesh leh Afghanistan laka a khelh dan en chuan India tana bul ṭan reng hi a phu em, tih chu zawhna awm thei tak a ni. 

Pronay Halder-a'n Stimac hminna remchang a neihah a hun ṭha a chhawr lo a, Sahal Abdul Samad hi player beiseiawm tak angin lang mah se tun hnaia a khelh dan en chuan dah san a harsa hle. Sunil Chhetri-a'n thlawptu a nei 

ṭha tawk lo a, kum 35 mi a nih ve tawh bawk si avangin Bengaluru FC striker tan India rinrawl nih reng a harsa chho dawn niin a lang ṭan. 

Stimac-a'n Ningani zanah thutlukna siam fuh pakhat a nei ve a, chu chu minute 76-naa Kotal la chhuaka FC Goa forward Seminlen Doungel a luhtir kha a ni. 

Kum 25 mi forward hian hun pek belhah India si phurh sutna goal a rawn khung a, mahse Manipur forward-in goal a rawn khung meuh hi chuan hun pek belh minute thumna a ni tawh. India tan nawr chhunzawm turin hunin a daih tawh lo a, 1-1 ah an lungawi a ṭul. India coach Igor Stimac chuan, "Afghanistan ai khan chance kan ngah zawk a, hnehna chan kan phu a ni," tiin a sawi a, a thusawi ṭawmpui erawh an tam lo ang. 

Blue Tigers hian Thawhlehni zanah match an nei zui leh dawn a, match hmasa bera 2-1 a an ngam loh tawh Oman chu khualmualah an lenchilh chhunzawm dawn a ni.