Electric Veng an êng thei dawn em?

Mizoram Premier League history-a semifinal lut teuh bera sawi theih chu Electric Veng an ni a, an season khatnaah round 13 chhung a sang paliah awmin round tawp berah panganaah an tla thla. Tun season-ah pawh Electric Veng hi vanduai nawn thei dinhmunah an ding a, coach Lalsangzuala Hmar hnuaiah thlenna ngai loh thlen an inbeisei mek.

Vawiin tlai dar 4:00 hian Electric Veng FC hian Ramhlun North FC an hmachhawn dawn a, table-a an dinhmun thlir chuan chak tura ngaih an ni. Mahse, Sanga hote hian an match hnuhnung berah table mawngphaha awm Chawnpui FC an hneh lo a, inrintawkna an hloh. Harsatna belhchhah turin MPL best defender ni lai PC Laldinpuia chu hrem vangin a khel thei dawn lo a, tawnhriat nei ṭha Lalrammawia leh Lalnunmawia te hliam vangin an dinhmun a chiang lo.

Electric Veng coach Lalsangzuala Hmar chuan, "Coach kan nih vangin kan tihtur chu kan ti a, tunah chuan player kutah a innghat tawh. Chawnpui kan hneh loh chhan langsar ber chu player-ten an khingpui an dahhniam vang a ni a, a thleng nawn tawh tur a ni lo. Semifinal luh kan duh a nih chuan Ramhlun North hi kan hneh ngei ngei a ngai," tiin Vanglaini a hrih.

Ramhlun North tan pawh MPL khel zel turin point hmuh a pawimawh dawn a, hei vang hian Electric Veng hi êng tur chiang saa dah a rem lo.