Djokovic hnehin Federer a tlang
Roger Federer chuan inkhel pawimawh takah Novak Djokovic hnehin ATP Finals khelh laiah semifinal a in vaw kai a, Serbian tlangval tan world number 1 ni chunga season khar a tumna chu a tih tawpsak nghal bawk.
Ningani zan O2 Arena, London-a inkhelah Swiss star Federer hian 6-4, 6-3 in hnehna a chang a, semifinal-ah chuan Rafael Nadal emaw Stefanos Tsitsipas a hmachhawn leh ang - player pahnih aṭang hian nizan khan semifinal lut tur zawk a chiang ang.
Group match inkhel dangah beisei nei tawh lo Matteo Berrettini chuan tlang chiang tawh Dominic Thiem chu 7-6 (7-3), 6-3 in a hneh ve thung a, seeded pariatna Berrettini hi Italian player zingah ATP Finals match-a hnehna chang thei hmasa ber a ni.
A hunah Federer
World number 3 Federer-a'n a match hmasa berah Thiem a hneh lo a, atan semifinal kawng a harsa. Mahse, tawnhriat ngah player ṭha hian a match hnihnaah Berrettini hnehin tunah Djokovic a hneh zui leh ta.
Vawi ruk a champion tawhna hmunah Federer a ropui leh mek a, Serbian tlangval lakah a service a hloh miah loh laiin a khingpui service chhuhsak theihna hun ṭha vawi sarih a insiam zinga vawi thum chu a ti hlawhtling thei.
Kum 38 mi Federer chuan, "Wimbledon-ah khan ka chak teuh hle, tunah chuan match point ka la ta," a ti. Player ropui pahnih hi Wimbledon final-ah an intawng a, inkhel hmuhnawm leh rei takah Federer hi a lo chak lo tawh a ni.
Chak a phu
Federer nen an intawn hnuhnung paliah Djokovic a chak vek a, mahse tun ṭum inkhel pawimawhah erawh Swiss star hi kawng engkimah a chungnung zawk - match thum khelhah vawi khat chauh chak Novak tan semifinal kawng a ping.
Tun season Australian Open leh Wimbeldon champion Djokovic chuan, "Roger kha a che vel a fuh vel vek a, kawng engkimah khan ka tluk lo a ni - hnehna chan a phu zawk. Match tawp lamah kha chuan ka dar na khan ball vuak a ti har ve bawk," a ti.
Djokovic tan mimala inelna chu tun season atan a tawp zui a, ram tan erawh a la inlan thei. Karleh hian Madrid khawpuiah Davis Cup Finals khelh tur a ni a, Serbia tan inlan theih ngei a beisei thu a sawi tel bawk.