Euro 2020 khel tur England

Montenegro tan Three Lions hahum ri chu dawl zawh rual a ni lo a, Wembley Stadium-ah dawl zawrin an zawr - England hian 7-0 in an mikhual team hi an lo sawp. 

England-in hnehna an chan avangin Euro 2020 khel turin an tling chiang a, international match 1000-na an khelh danah sawisel tur a awm lo. Harry Kane chuan striker ṭha bik a ni tih pholangin hattrick a siam a,  Alex Oxlade-Chamberlain, Marcus Rashford leh Tammy Abraham ten goal khat ṭheuh an khung. 

Three Lions-in goal khungpui mamawh lo mah se Aleksandar Sofranac chuan an lamah a ti lut bawk a, group A inkhel dangah Czech Republic chuan 2-1 a Kosovo hnehin Euro 2020 an khel ve dawn bawk. 

England-in international match 1000-na an khel a, a lawm nan inkhelh hma hian 1966 World Cup champion team-a player-te leh England legend-ten stadium an fang kual a, mipuiin an lawm hle. 

Three Lions-in he zan danglam bik hi holam taka khawhral an tum lo a, thla 18 hnua a vawi khat nana England tana bul ṭantu Chamberlain chuan minute 11-naah goal hmahruai hi a khung. Kane-a inlar zui a, Tottenham Hotspur striker hian club-in result an neih ṭhat lohte theihnghilhin England tan hattrick a rawn siam - Kane-a goal khung kar lakah Rashford chuan a khung ve bawk. 

England goal hnuhnung pahnih hi Chelsea players ke aṭanga chhuak ve ve a ni. Mason Mount-a shot chu Aleksandar Sofranac chuan an lamah a ti lut a, Abraham chuan England tana a goal hmasa ber a khung zui. 

England-in Montenegro an mikhual hma hian Raheem Sterling leh Joe Gomez ten buaina an nei a, he thil thleng avang hian Sterling chu squad aṭanga paih a ni hial. Player pahnih inkarah remna awm tawh mah se tam takin England team boruak a ti chhia ang tih an hlau a, mahse Three Lions player-ten an puitlinzia pholangin inkhel hmuhnawm an pho chhuak. 

Minute 70-naah Gomez hi bench aṭanga luhtir a ni a, Sterling chuan a awm hmun aṭangin kut bengin a lo lawm - fans ṭhenkhatin an lo au el thung a, fan-ten sawisel an hlawh. Kum 24 mi Sterling chuan a ṭhianpa hi chhan nghalin, "Ka thiam lohna avanga midangin an tuar kha a pawi ka ti," a ti a, England manager Gareth Southgate chuan, "Fans chet dan ka hrethiam lo a, Joe hian tihsual a nei lo," tiin a sawi ve bawk. 

England hian Pathianni zan dar 10:30-ah Kosovo an lenchilh dawn a, Euro 2020 khel tura an tlin chian tawh avangin Southgate-a'n player hmun chang tam lo tan hun ṭha a siamsak a nih pawhin a mak lo ang. 

Kosovo hi Ningani zan inkhel dangah Czech Republic lakah 2-1 in an tlawm a, Euro khelh beiseina an la neih ve chu tih mih sak an ni - England nena an inkhel result hian engmah a sawi danglam thei tawh lo. Sheffield Wednesday striker Atdhe Nuhiu chuan Kosovo tan minute 50-naah goal hmahruai khungin beiseina a siamsak a, mahse Alex Kral leh Ondrej Celustka ten Czech tana sutin an chak. 

Czech Republic hi Pathianni zan dar 10:30-ah vek an inlan dawn a, group mawngphaha point thum chiah nei Bulgaria an lenchilh ang.