Ibra-a'n tum ropui a nei

Swedish striker Zlatan Ibrahimovic chuan a thinlunga AC Milan chu a la inthai reh loh thu a sawi a, Italian club chu 'mascot' mai mai ni tura zawm a nih loh thu a sawi bawk. 

Kum 38 mi striker hian Rossoneri (AC Milan sawina) tan hian season tawp thleng khel turin contract a ziak a, 2010-12 chhung kha he club tan hian lo khel tawhin league match 61-ah goal 42-a khungsak.  November-a LA Galaxy chhuahsantu striker chuan, "Ka tih tur chu ka hria a, Zlatan chu ka la awm reng e. Ka theihna zawng zawng pho chhuak a, ṭha taka khelh leh tum hian ka ring ka fan vel a ni," a ti. 

Inter Milan leh Barcelona tan pawha lo khel tawh striker chuan, "Kum 20 mi ka nih lai ai khan kum 38 ka nih hnuah sawmtu ka ngah zawk," a ti a, theihna sang tak a la neih thu a sawi. AC Milan hi Serie A-ah point 21 neiin 11-na an ni mek a,  match 17 an khel tawh. Zanin dar 7:30-ah Sampdoria nen an inkhel dawn a, Ibra inlan a la beiseiawm loh. European champion vawi sarih ni thei club hian kum 2011 hnuah nomawi liantham chawi an nei leh tawh lo a, Ibra hoin insiamṭhat an tum ang.