Netherlands kan hmu leh dawn ta

Kum 2014 hnua a vawi khat nan Netherlands chuan major tournament an khel ve leh dawn ta a, Inrinni zan khan Northern Ireland chu 0-0 a inhnehtawkpuiin Euro 2020 an khel dawn chiang ta. 

Germany-in 4-0 a Belarus sawpin Euro khel turin an tling chiang ve bawk a, Northern Ireland tan automatic qualification beiseina a thamral thung. Toni Kroos chuan Germany tan goal hnih a khung a, Matthias Ginter leh Leon Goretzka ten goal khat ve ve an thawh ve bawk. Germany muala inkhelah Belarus lamin a chhanletna tur an nei lo. 

Michael O'Neill enkawl Northern Ireland hian playoff hmangin Euro khelh theih dan erawh an la nei a, nakkum March an nghah leh phawt a ngai dawn. 

Khawvela football ram ṭha pawla sawi ni ṭhin Netherlands-in kum 2014 khan World Cup-ah pathumna dinhmun an luah a, mahse hemi hnuah erawh major tournament an khel leh tawh lo!

Kum 2016 khan Euro khel turin an tling zo lo a, kum hnih hnuah World Cup khelh an beiseina chu a thamral zui. Football thiam ram tia hriat ṭhin ram khan a zawnin major tournament an khel lo a, fan-te lung a leng. Mahse, 2019 a herchhuah meuh chuan Virgil van Dijk, Matthijs de Ligt, Georginio Wijnaldum, Frenkie de Jong, Donny van de Beek leh Memphis Depay te hoin Netherlands jersey ha chungin ṭha takin hna an thawk a, major tournament an khel leh dawn ta. 

Barcelona nena sawizawm mek Netherlands coach Ronald Koeman chuan, "Hei aia ṭha leh result duhawm zawk kan duh zel a, European championship khel tura kan tling hi kan lawm takzet a ni. Team harsa tak Germany leh tawh khirh tak Northern Ireland kan awmpui a, hna ropui tak kan thawk a ni," a ti. 

Northern Ireland coach Michael O'Neill-a'n tun hnaiah Championship club talbuai Stoke City a zawm a, heitchung hian an ram team enkawl hna a thawk chhunzawm. O'Neill hian playoff thleng chu Northern Ireland hi a enkawl chhunzawm ang - Netherlands lakah hian chak turin hun ṭha an nei a, mahse captain Steven Davis chuan penalty hi goal-ah a chantir thei tlat lo. 

Rangers midfielder Davis hi Northern Ireland tana a vawi 116 inlanna a ni a, United Kingdom hnuaia ram tana midfielder inlan hnem ber record David Beckham-a neihlai chu a khum. Euro 2020 khel tura Sweden an tlin avangin NI hian playoff an khelh theih phah dawn - UEFA Nations League B-a playoff khel tur hmun ruak chu NI hian Sweden chak zarah an chang a ni. 

Group C hmahruaitu ni turin Germany-in an kawng daltu an tawng lo a, Belarus chu harsatna nei loin 4-0 ngawtin an sawp - match sarih aṭangin point 18 an nei thei. Monchengladbach-a inkhelah mualneitu Borussia Monchengladbach defender Matthias Ginter chuan minute 41-naah Germany tan goal hmahruai a khung a, Bayern Munich midfielder Leon Goretzka chuan minute 49-naah a chhunzawm ve leh zui. 

Real Madrid midfielder Kroos chuan goal hnih a rawn khung ve leh bawk a, Belarus hian hun tawp nan minute 15 chauh a awm tawh tihah penalty hlawh chhuak ve bawk mah se Ihar Stasevich-a pet chu Manuel Neuer chuan ṭha zetin a dansak. 

Germany hian Thawhlehni zan dar 1:15-ah Northern Ireland nen match an nei leh dawn a, Netherlands-in Estonia an mikhual dawn thung - Germany an chak loha Netherlands an chak chuan Dutch team hi group hmahruaitu an ni daih thei.