Federer-a'n final lut zo lo

Mipa tennis player thiam zual pariat inelna ATP Finals-ah Roger Federer chu ṭha takin inlan mah se final a thleng zo lo. Inrinni zan khan Swiss star hi semifinal-ah Stefanos Tsitsipas hneh loin a zinkawng a tawp.

Inrinni zan semifinal inkhelah kum 21 mi Tsitsipas hian Federer hi 6-3, 6-4 in a hneh a, semifinal inkhel dangah Dominic Thiem chuan champion lai Alexander Zverev chu 7-5, 6-3 in a hneh ve bawk. Kum 38 mi Federer chuan, "Chak thei turin hun ṭha chu ka nei ngei mai, mahse ka duh ang vekin thil a kal thei lo a ni. Hetianga inelna sangah chuan tihsual zeuh neih hi a pawi a, player ṭha tak tak vek an nih avangin chetsual a awlsam," a ti.

Grand Slam vawi 20 champion tawh Federer hi a kum tam deuh tawh mah se chawlh mai a la tum lo. Season tharah chuan tournament zawng zawngah inlan lo mah se inelna lian bikah erawh player hlauhawm a la nih chhunzawm ang.

Zirtawpni zan khan Rafael Nadal pawhin a group match hnuhnung berah Tsitsipas hi hneh mah se semifinal thlen nan a tawk zo lo a, Greek tlangval hi chak lo mah se Nadal nen an inkhelh hmain semifinal a lut chiang tawh a ni.

Nizan zanlai khan O2 Arena, London-ah a thiam ber zawnna neih leh nghal a ni a, he thu buatsaih lai hian result kan hre hman lo. Thil chiang awm thei erawh champion thar kan hmu dawn. Thiem leh Tsitsipas te hi ATP Finals-ah an la champion ngai lo a ni.