Berdych a chawl ta

Tennis world number 4 hlui Tomas Berdych chuan infiamna a ngainat leh hmangaih ber a mangṭha thu a sawi a, season thar aṭang chuan tennis court-ah a hmel kan hmu tawh dawn lo tihna a ni.

Kum 34 mi Berdych hian kum 2010 khan Wimbledon final lutin Rafael Nadal lakah a chak lo. Nadal leh Roger Federer te vanglai nen a hun tawn a inrual miau avangin Grand Slam lamah a hlawhtling zui lo a, ATP singles title erawh 13 ngawt a vaw chhuak ta tho.

Season kal laia Grand Slam hnuhnung ber US Open-ah khan a inlan a, a match hmasa berah Jenson Brooksby a hneh lo. New York khawpuia a inkhelh kha kum 17 chhung a chenchilh tawh tennis tournament bika a match hnuhnung ber a ni ta.

Czech Republic tana Davis Cup 2012 leh 2013 nomawi chawitu Berdych chuan, "Match hnuhnung ber ka khelh kha ka rilru chhungrilah chuan a tawk tawh e, tihna a awm. A sang thei ang ber thlen tumin ka theihna zawng zawng ka hlan ṭhin a, tuna ka thlen chinah hian ka lawm," a ti.