India-in Bangladesh an sawp

India-in ṭhenawm ram Bangladesh cricket an zirtir a, Test match an khelh tura a hmasa zawkah  innings khat leh run 130 in an sawp. Second Test hi Eden Gardens-ah November 22-26 hian khelh leh a ni ang.

Holkar Cricket Stadium, Indore-a inkhelah Bangladesh-in vuak hmasak an thlang a, India-in tun hma zawng aia bowler an neih ṭhat tawh avangin thutlukna an thlang sual.  Mushfiqur Rahim (43) leh Mominul Haque (37) te run siam zat a ziaawm a, Bangladesh batsman dang erawh India bowler lakah an zawr.

First innings-ah India bowler Mohammed Shami-a'n (27/3) wicket thum lain Ishant Sharma (20/2), Ravichandran Ashwin (43/2) leh Umesh Yadav (47/2) ten wicket hnih ṭheuh an la. India bat hun a thleng a, opener Mayank Agarwal chuan run 243 zet a siam. Ajinkya Rahane (86) leh Ravindra Jadeja (60) ten an thlawp ṭha bawk a, captain Virat Kohli duck out vangin an buai phah lo. Men in Blue hian 493/6-ah an duh tawk a, Bangladesh-in an bat chhunzawm.

Mikhual team tan Mushfiqur Rahim bawk rawn che ṭhain run 64 siam mah se thlawptu a nei ṭha lo a, India bowler-te an ding chang. Mohammed Shami-a'n wicket li (31/4) a lak bakah Ravichandran Ashwin-a'n wicket thum (42/3) lain Bangladesh hi run 213 an siam tihin an thi vek a, first innings-a India run siam zat  493 chu run 130 in an pha lo.